२० मंसिर, एजेन्सी ।
इजरायलसंग करिब करिब युद्ध भड्किने स्थितिमा रहेको इरानमा एक यस्तो कानून पारित भएको छ, जसको विरोध स्वयं त्यहाँका राष्ट्रपतिले नै गरेका छन् । खासमा इरान एक यस्तो देश हो जहाँको कानून निकै कडा छ ।
विशेषगरी महिलाहरुका लागि ।इरानी महिलाहरुले हिजाब नलगाए उनीहरुलाई कडा सजाय दिइने गरिएको छ । यद्यपि, त्यहाँका महिलाहरुले पटक पटक हिजाबविरुद्ध प्रदर्शन पनि गर्दै आएका छन् ।
२०२२ मा ईरानी कुर्दिश महिला महसा अमीनीलाई हिजाब कानून तोडेको आरोपमा पक्राउ गरिएको थियो, र उनको प्रहरी हिरासतमा ज्यान गएको थियो, त्यसपछि अमीनीको प्रहरीले यातना दिएर हत्या गरेको भन्दै आन्दोलन उग्र भएको थियो ।
विश्वभरबाट दबाब परेको थियो । जसलाई नियन्त्रणमा लिन ईरानी प्रशासनलाई हम्मे हम्मे परेको थियो । अहिले फेरि नयाँ हिजाब कानून ईरानी संसदले पास गरेको छ जसलाई लिएर एक पटक फेरि विश्वभर तरंग उत्पन्न भएको छ ।
स्वयं ईरानका राष्ट्रपतिले यसलाई ठिक मानेका छैनन । बुधबारमात्रै ईरानी संसदले नयाँ “पवित्रता र हिजाब” कानून, पास गरेको छ । र यो ईरानी राष्ट्रपतिले विरोध गर्दा गर्दै भएको हो । यो विधेयकलाई पारित गर्ने पक्षमा बुधवार १५२ सदस्यहरुले मत दिए, जबकि विरोधमा ३४ मत मात्रै खस्यो ।
यो नयाँ कानूनमा स्पष्टरुपमा भनिएको छ, यदी कुनै पनि महिला सार्वजनिक स्थलहरुमा अनुचित पोशाक लगाइएको पाइयो भने ति महिलालाई चौथो दर्जाको सजाय दिइने छ । झट्ट हेर्दा यो कानून पुरानै जस्तो लागेपनि यो नयाँ कानूनमा सबैभन्दा नयाँ कुरा भनेको यसमा बढाइएको सजायको प्रावधान हो ।
पहिलाको कानून उल्लंघनमा दोषी महिलालाई १० दिनदेखि २ महिनासम्मको कैद सजा र ६ हजारदेखि ६ लाख रियालसम्म जरिवाना हुन्थ्यो । तर अहिलेको नयाँ कानूनअनुसार त्यसको पालना नभए फोर्थ डिग्रीको सजायको प्रावधान छ ।
जसमा कैदको सजाय ६ देखि १० वर्षसम्म छ र जरिवानामा पनि १८ करोडदेखि ३६ करोड रियाल राखिएको छ । यतिमात्रै होइन यो कानून लागू हुनासाथ यसमा निगरानी पनि निकै कडा हुनेछ । हरेक ठाउँमा सीसीटीभीबाट निगारनी गरिने छ ।
ईरानमा पहिलादेखि नै सार्वजनिक स्थानहरु र सोशल मीडियाहरु ठिक ढंगले हिजाब नलगाउने वा हिजाब लगाउँदै नलगाउने महिलाहरुका लागि निकै कडा छ । यस्तै नयाँ कानूनमा हिजाबको मजाक उडाउने र सोशल मीडियामा शरीरका भाग देखिने लुगा लगाउन प्रोत्सहित गर्नेलाई पनि कडा सजाय दिइने उल्लेख छ ।
यसमा ति मानिसहरु पनि सामेल छन्, जसको कारमा महिला ड्राइभर वा महिला यात्रीले नियमहरुको उल्लंघन गर्नेछन् । यहाँसम्म कि कपडा व्यापरीहरुमाथि पनि कडा नजर राखिने छ । ताकी उनीहरुले बेच्ने कपडा पनि कानूनअनुरुप कै होउन ।
ईरानी संसदपछि यो कानून अब राष्ट्रपति मसूद पेजेशकियनको हस्ताक्षरका लागि पठाइने छ । जसले स्वयं देशको ड्रेस कोड नियमहरुको आलोचना गरेका थिए । र यो विधेयकको पनि विरोध गरेका थिए ।
उनी सुधारवादी मंचका नेता मानिन्छन् । जो गत वर्ष नै चुनिएका थिए । शरियामा आधारित ईरानको संविधानका अनुसार राष्ट्रपतिलाई कानून लागू गर्नबाट रोक्ने अधिकार त छ तर उनले यसो गरे भने त्यहाँका कट्टरपन्थी र रूढविादिहरुसंग उनको टकराव हुने संभावना छ ।
