एजेन्सी,असोज १३
इन्डोनेसियामा गएको शक्तिशाली भूकम्पका कारण मृत्यु हुनेको संख्या झन्डै ४ सय पुगेको छ । सुलावेसी क्षेत्रमा गएको भूकम्प र त्यसपछिको सुनामीमा परी मृत्यु हुनेहरुको संख्या बढिरहेको अधिकारीहरुले जानकारी दिएका छन् ।
अरु सयौंजनाको अस्पतालमा उपचार भइरहेको उनीहरुको भनाइ छ । घाइतेहरुको उद्धार गर्दै अस्पतालसम्म ल्याउनेक्रम पनि चलिरहेको बताइएको छ । प्रकोप व्यवस्थापनसम्बन्धी कार्यालयका सरकारी अधिकारीहरुले दिएको जानकारीअनुसार यो समाचार लेख्दासम्म ३८४ जनाको मृत्यु भएको छ ।
उनीहरु सबैको पालुमा मृत्यु भएको र मृत्यु हुनेहरुको संख्या अझ बढ्नसक्ने देखिएको अधिकारीहरुको भनाइ छ । सुनामी आएपछि मानिस आत्तिएर चिच्याइरहेका र भागिरहेका थिए । एउटा मस्जिदमा पनि क्षति पुगेको बताइएको छ ।
अस्पताल, होटल र पसललगायतका हजारौं घरहरू भत्किएका छन् । यस क्षेत्रमा अहिले विद्युत तथा सन्चार सेवा अवरुद्ध भएका छन् भने पहिरोका कारण कतिपय मुख्य बाटोहरु अवरुद्ध भएका छन् ।
शक्तिशाली पराकम्पनले उक्त सहरलाई निरन्तर धक्का दिइरहेको र सुलावेसी टापु हुँदै पालु सहर आएको सुनामीको छाल तीन मिटरसम्म अग्लो रहेको स्थानीय बासिन्दाले बताएका छन् ।
इन्डोनेसियाको तटीय सहरमा शुक्रबार ७.५ म्याग्निच्यूडको शक्तिशाली भूकम्प गएपछि शक्तिशाली सुनामी पनि आएको हो ।
