विराटनगर : विराटनगर १४ र १७ को सिमानामा पर्ने भित्री सडकमा राखिएको ह्युमपाइपभित्र भेटिएको शवको पहिचान खुलेको छ ।
गत असोज ७ गते सडिएको अवस्थामा भेटिएको शव एक साताको अनुसन्धानपछि विराटनगर–१७ का मोहम्मद अस्फाकको भएको खुलेको हो ।
अस्फाक गत असोज १ गतेदेखि अपहरणमा परेका थिए । अपहरणमा परेका उनलाई सोही दिन हत्या गरी ह्युमपाइपभित्र लुकाईएको आरोपमा प्रहरीले दुईजनालाई पक्राउ गरेको छ ।\
पक्राउ पर्नेमा २० बर्षीय मोहम्मद सद्दिक हुसेन र २१ वर्षिय मोहम्मद् अरिफ आलम छन् । वैदेशिक रोजगारीमा जाने तयारीमा रहेका हुसेनले खर्च जुटाउनका लागि आलमसँग मिलेर अस्फाकको अपहरण गर्ने र फिरौती लिएर छाड्ने योजना बनाएका थिए ।
असोज १ गते गौतमबुद्ध स्कुलमा अध्ययनरत अस्फाकलाई बोलाएर मदिरा सेवन गरे । मध्येरातमा मदिरा सेवन गरेका उनीहरुले अस्फाकको टाउकोमा ढुङ्गा प्रहार गरे ।
उनलाई बन्धक बनाएर फिरौती माग्ने योजना बनाएका थिए तर ढुङ्गा लागि ढलेका अस्फाकको घटनास्थलमै मृत्यु भयो ।१० बजे सडकमै छाडेको शव उनीहरुले घटनास्थलमा पुगी बिहान ३ बजे मात्रै ह्युमपाइपभित्र हालेका थिए ।
शव लुकाएपछि अस्फाकका बुबा खलिलसँग मोलमोलाई सुरु गरे ।छोराको अपहरण गरेको भन्दै मोबाइलबाट पटक–पटक एसएम्एस आयो ।
५० लाखबाट मोलमोलाई सुरु गरेका उनीहरुको ५ लाखमा सहमती भएको थियो तर मोलमोलाई चलिरहेकै बेला असोज ७ गते ह्युमपाइपभित्र अस्फाकको शव भेटिएको थियो । यो समाचार आजको उद्घोष दैनिकमा छापिएको छ ।
