२० चैत , काठमाण्डौ ।
गत चैत्र १५ गते, भाटभटेनी सुपरमार्केटका लागि एक साधारण दिन अचानक असाधारणमा परिणत भएको थियो। जब लुटेराहरूको आतंकको शैलीले त्यहाँको शान्ति भङ्ग ग¥यो, सुरक्षा गार्ड दुलप्रसाद पराजुलीको एक वीरता उजागर भयो ।
उनले एक्लै लुटेराहरूको सामना गर्दै, आफ्नो ज्यानको परवाह नगरी सुरक्षा र साहसको अद्वितीय उदाहरण प्रस्तुत गरे। लुटेराहरूले भाटभटेनीको स्टोरमा प्रवेश गर्दा, पराजुलीले निडरता देखाउँदै उनीहरूको प्रतिकार गरे।
उनको साहसिक भिडियो संसारभर फैलियो, जसको धेरैले प्रशंसा गरेका छन् । आज, भाटभटेनी सुपरमार्केटले पराजुलीलाई विशेष सम्मान प्रदान गर्दै, ५ लाख १ हजार १ सय ११ रुपैयाँको नगद, एक फूली र पाँच ग्रेडको बढुवा दिएको छ ।
लुटपाट गर्न गएका लुटेराहरूसंग बहादुरीपूर्बक लडेर उनीहरुलाई लखेट्ने बीर सुरक्षा गार्ड दुलप्रसाद पराजुलीलाई भाटभटेनी सुपर स्टोरले उच्च सम्मान गरेको छ । ५ तह बढुवा सहित नगद ५ लाख रुपैया प्रदान गरेको छ ।
उनलाई आज एक कार्यक्रमबीच ५ लाख १ हजार १ सय ११ नगद रुपैयाँ पुरस्कार, एक फूली र पाँच ग्रेड बढुवाको सम्मान प्रदान गरिएको हो ।भाटभटेनीका सञ्चालक मीनबहादुर गुरुङले उनलाई दुबोको मालासहित पराजुलीलाई सम्मान गरेका छन् ।
कार्यक्रममा सो दिन भएको लुटपाट र तोडफोडमा भाटभटेनीलाई जोगाउन भूमिका खेल्ने अन्य तीन सुरक्षा गार्ड सूर्य गिरी, दीपेश खड्का, सोमबहादुर भुजेललाई २५ हजार १ रुपैयाँ र एक ग्रेड बढुवा गरिएको छ ।
यस्तै ग्रोसरी सिनियर सुपरभाइजर सागर गुरुङलाई ५१ हजार एक सय ११ को चेक र दुई ग्रेड बढुवा प्राप्त गरेका छन् । सुरक्षा गार्ड पराजुलीले त्यस दिन लुटपाट गर्नेहरूको एक्लै प्रतिकार गरेका थिए ।
उनले लुटेराहरूलाई पिटेर लखेटेको भिडिओ सामाजिक सञ्जालमा भाइरल बनेको छ । पराजुली २२ वर्षदेखि भाटभटेनीमा काम गर्दै आइरहेका छन् ।यस्तै भाटभटेनी सुपरमार्केटका सञ्चालक गुरुङले गत चैत १५ गतेको घटनामा मृत्यु भएका दुई युवाको परिवारलाई आर्थिक सहयोग गर्ने घोषणा गरेका छन् ।
उनले पत्रकार सुरेश रजक र सवारी मजदुर सविन महर्जनको परिवारलाई आर्थिक राहत दिने बताएका हुन् । उनले सुरेशको परिवारलाई ५ लाख र सविनको परिवारलाई ३ लाख दिने घोषणा गरे ।
सो अवसरमा गुरुङले राजासंस्था फर्काउने आन्दोलनका जनकमान्डर बनाइएका दुर्गा प्रसाईँलाई गुण्डानाइकेको संज्ञा दिएका छन् । राज्यले उनलाई पुलपुल्याउँदा अहिले वितण्डा निम्तिएको उनको भनाइ छ ।
सरकारले व्यवसायीको सुरक्षा गर्न नसकेको भन्दै उनले आक्रोश पनि पोखेका छन् । ‘हामीले वर्षेनी ट्याक्स तिर्छौँ सरकारलाई । हाम्रो ट्याक्सबाट सरकारले सुरक्षामा खर्च गर्छ । तर, हामीलाई सुरक्षा खोइ ? हाम्रा दशौँ हजार भाइबहिनीको सुरक्षा खोइ ? दुलप्रसाद पराजुलीले मात्रै गरेर सुरक्षा हुन्छ ?’
राज्यले एउटा डनलाई पुल्पल्याएर राखेको हुँदा यो परिणाम आएको उनले बताए । उनको क्रियाकलापले राजसंस्था नआउने गुरुङले ठोकुवा गरे । ‘मारवाडीले यस्तो ग¥यो, त्यस्तो ग¥यो भन्दै हिँड्छ । मारवाडी देशको नागरिक होइन ? मारवाडी भगाउन सम्भव छ ? देश कंगाल बनाउने ? दुर्गा प्रसाईँ गुण्डा नाइके हो ।
राज्यले पुलपुल्याउँदा आज यो परिणाम देखियो । उसको क्रियाले राजसंस्था फर्किँदैन, म ठोकुवा दिएर भन्छु । भाटभटेनीलाई लुटपाट गरेर राजसंस्था फर्किन्छ ? भाटभटेनीमा ढुंगा हानेर नेपालको संविधान संविधान मेटिन्छ ? हामी बुझ्दैनौँ ? यो सबै डकैत हो ।’
शुक्रबारको घटनामा ७० लाखभन्दा बढीको क्षति भएको समेत गुरुङले बताएका छन् । सम्मान कार्यक्रममा बहादुरी देखाएका पराजुलीले पनि सो दिनको घटना स्मरण गरेका थिए। उनले भने, त्यो दिन आतंककारी आए । ढुंगामुढा गर्न थाले । ज्यान त जोगाउनुप¥यो भनेर साइड लागेर बस्यौँ ।
हामी साइडमा बस्दाखेरि उनीहरू सबै पसेर लुट्न थाले । फलफूल, बियरका बोतल, वाइन, राइसकुकर फ्रिज सबै लिएर गए । लौ भएन भनेर हामी सबैजना टिम मिलेर यता आयौँ। अरू भित्रबाट लखट्ने, म चाहिँ बाहिर बसेर ड्याङ् कि ड्याङ हान्ने । बाहिर म एक्लै भए पनि डर लागेन ।
पराजुलीले २०५८ सालदेखि जागिर खाएको भन्दै यही जागिर खाएर जग्गा किनेको, घर बनाएको ,छोरा पढाएको , छोराको बिहे गरेको र गाडी समेत किनेको बताए । प्रसाईंको आह्वानमा राजसंस्था पुनस्र्थापनका लागि भन्दै चैत १५ गते तीनकुनेमा प्रदर्शन थियो।
सो क्रममा झडप भएको थियो। प्रहरीले पानीका फोहरा, अश्रुग्यास र गोली चलाएको थियो भने प्रदर्शनकारीहरूले तोडफोड, आगजनी र लुटपाट गरेका थिए। सोही दिन कोटेश्वरस्थित भाटभटेनी सुपरमार्केट भवनमा ढुंगा प्रहार र लुटपाट भएको थियो ।
