२६ चैत , एजेन्सी ।
इजरायलका प्रधानमन्त्री बेन्जामिन नेतन्याहुले अमेरिकी राष्ट्रपति डोनाल्ड ट्रम्पसँग भेटवार्ता गरेका छन् । सोमबार ह्वाइट हाउसमा दुई नेताबीच भएको भेटमा इरान, भन्सार शुल्क ९ट्यारिफ० र हमासद्वारा बन्धक बनाएका इजरायली नागरिकका विषयमा छलफल भएको बीबीसीले उल्लेख गरेको छ ।
यसैबीच जब राष्ट्रपति ट्रम्पलाई सोधियो कि त्यहाँ ट्यारिफ लगाउन कुनै रोक छ रु जवाफमा उनले भने, ‘हामी यस्तो सोचिरहेका छैनौँ । हामीसँग व्यापार सम्झौता गर्न धेरै देश आउँदै छन्, तर यी सम्झौता निष्पक्ष हुनेछन्।’ यस विषयमा प्रधानमन्त्री नेतन्याहुले भने, ‘हामी अमेरिकासँगको व्यापार घाटा हटाउनेछौँ । हामी छिट्टै यो गर्न चाहन्छौँ। हामीलाई लाग्छ– यो सही कदम हो र हामी व्यापारका अवरोध पनि हटाउनेछौँ।’
इजरायलका प्रधानमन्त्री नेतन्याहु अमेरिकाले विश्वका विभिन्न देशलाई भन्सार शुल्क तोकेपछि राष्ट्रपति ट्रम्प भेट्ने पहिलो अन्तर्राष्ट्रिय नेता हुन् । यता अमेरिका र इरानबीच पनि शनिबार परमाणु सम्झौताका लागि प्रत्यक्ष वार्ता हुने सम्भावना छ ।
राष्ट्रपति ट्रम्पले सोमबार अमेरिका र इरानबीच यसबारेमा उच्चस्तरमा छलफल भइरहेको बताएको बीबीसीले जनाएको छ । उनले सहमति नभए इरानका लागि त्यो धेरै नराम्रो दिन हुने चेतावनी दिएका छन् । गत महिना इरानी सर्वोच्च नेता आयतुल्लाह अली खामेनेईले प्रत्यक्ष वार्ताको प्रस्ताव खारेज गरेपछि ट्रम्पले सैन्य कारबाहीको चेतावनी दिएका थिए ।
इजरायली प्रधानमन्त्री बेन्जामिन नेतन्याहूसँग ह्वाइट हाउसमा भेटपछि ट्रम्पले यो वार्ताको बारेमा खुलासा गरे । नेतन्याहूले पनि इरानले परमाणु हतियार बनाएमा इरानमाथि आक्रमणको धम्की दिँदै आएका छन् । “हामी शनिबार इरानसँग ठूलो छलफल गर्दै छौँ । प्रत्यक्षरूपमा कुरा गरिरहेका छौँ । सम्झौता हुनसक्छ, जुन राम्रो हुनेछ,” अमेरिकी राष्ट्रपतिले ओभल अफिसमा भने ।
ट्रम्पले वार्ता सफल नभए इरान ठूलो खतरा पर्ने पनि बताए । “इरानसँग परमाणु हतियार हुनै हुँदैन । वार्ता असफल भए यो इरानको लागि निकै नराम्रो दिन हुनेछ,” ट्रम्पले बताए । यसबीच इजरायलले गत महिना हमासविरुद्ध पुनः युद्ध सुरु भएपछि गाजापट्टीमा आफ्नो उपस्थितिलाई नाटकीय रूपमा विस्तार गरेको खुलेको छ ।
हाल गाजा क्षेत्रको ५० प्रतिशतभन्दा बढी भूभाग इजरायलको नियन्त्रणमा आएको र प्यालेस्टिनीहरूलाई सानो भूभागमा सीमित गरिदिएको अमेरिकी समाचार संस्था एसोसिएटेड प्रेसले जनाएको छ । इजरायली सेनाले इजरायल र गाजा सीमानजिकैको ठूलो भूभाग नियन्त्रण गरेको बताइएको छ ।
यहाँ इजरायली सेनाले प्यालेस्टिनीहरूका घर, कृषि योग्य जमिन र आधारभूत संरचनाहरू नष्ट गरेका कारण यो क्षेत्र अब बस्न योग्य नरहेको बताइएको छ । साथै, सैनिक बफर जोनको आकार पनि हालका हप्ताहरूमा दोब्बर भएको छ ।
इजरायलले आफ्नो यो कदमलाई २०२३ अक्टोबर ७ मा भएको हमास आक्रमणपछि उसले बन्धक बनाएका बाँकी बन्दीहरू छोड्न बाध्य बनाउन आवश्यक अस्थायी कदम भनेर चित्रण गरेको छ । तर, मानवअधिकार समूहहरूले यसलाई इजरायलको दीर्घकालीन रूपमा गाजा कब्जा गर्ने एक कदम भनेका छन् ।
