२६ चैत , काठमाण्डौ।
जल तथा मौसम पूर्वानुमान महाशाखाका अनुसार आज देशका धेरै ठाउँमा मेघगर्जन चट्याङसहित हल्का वर्षाको सम्भावना रहेको छ । आज दिउँसो सबै प्रदेशको हिमाली तथा पहाडी क्षेत्रमा आंशिकदेखि साधारणतया बदली रही थोरै ठाउँमा मेघगर्जन र चट्याङसहित हल्का वर्षाको सम्भावना रहेको महाशाखाले जनाएको छ ।
महाशाखाका अनुसार मधेश प्रदेशसहित अरु प्रदेशको तराई क्षेत्रमा पनि आंशिकदेखि साधारणतया बदली रही केही ठाउँमा मेघगर्जन र चट्याङसहित हल्का वर्षाको सम्भावना रहेको छ ।
यस्तै कोशी, बागमती र गण्डकी प्रदेशको हिमाली क्षेत्रमा भने हल्का हिमपातको पनि सम्भावना छ । बंगालको खाडीबाट नेपालतर्फ आएको जलवाष्पयुक्त हावासँगै पश्चिमी वायु तथा स्थानीय वायुको समेत आंशिक प्रभावको कारण मौसम बदली हुने जल तथा मौसम विज्ञान विभागले जनाएको छ ।
विभागकी मौसमविद् शान्ति कँडेलले काठमाण्डौ उपत्यकामा आज दिउँसोपख हल्का पानी पर्ने सम्भावना रहेकाले वायु प्रदूषण पनि कम हुन सक्ने बताएकी छन् । छिटपुटदेखि हल्का वर्षासँगै हावाहुरी पनि चल्ने सम्भावना देखिएकाले हिजोअस्तिको तुलनामा प्रदूषण कम हुने उनको भनाइ छ ।
काठमाडौंका केही स्थानमा हल्का र केही स्थानमा फाट्टफुट्ट वर्षा हुनेछ । मौसम भने बदली भइरहने उनको भनाइ छ । काठमाडौंमा साँझबाट मौसम खुल्ने उनले बताएकी छन् । उनका अनुशार पूर्वबाट जति पश्चिम गयो त्यति वर्षा कम हुँदै जान्छ ।
बुधबार र बिहीबार पनि मौसममा बदली र वर्षा हुने मौसमविद् कँडेलले बताएकी छन् । बुधबार र बिहीबार पनि मौसममा बदली र वर्षा हुने मौसमविद् कँडेलले जानकारी दिइन् । लामो समयदेखि ठूलो वर्षा नहुँदा देशभर वायु प्रदूण बढेको छ ।
काठमाडौंसहित देशका धेरै सहरमा उच्च प्रदूषण छ । काठमाडौं लगातार विश्वकै प्रदूषित सहर बन्दै आएको छ । ठूलो वर्षा र हावा नचलेसम्म प्रदूषण घट्ने छैन ।
