२६ चैत , काठमाण्डौ।
काठमाडौँ महानगरपालिकाका मेयर बालेन शाहले तीनकुने घटनामा ज्यान गुमाएका सबिन महर्जन र सुरेश रजकका परिवारलाई भेटेका छन्। महर्जनका परिवारलाई कीर्तिपुर र रजकका परिवारलाई डल्लु पुगेर भेट्दै उनले समवेदना व्यक्त गरेको उनको सचिवालयले जनाएको छ ।
चैत्र १५ गते भएको राजावादी समूहको प्रदर्शनका क्रममा दुई युवाको ज्यान गएकोप्रति दुःख व्यक्त गर्दै मेयर शाहले कुनै पनि व्यक्तिले ज्यान गुमाउनु सामान्य विषय नभएको बताएका छन् । उनले अपराध जुनसुकै पक्षबाट भएको भए पनि त्यसको निष्पक्ष छानबिन हुनुपर्ने र दोषी उपर कडा कानुनी कारबाही गर्नुपर्नेमा जोड दिएका छन् ।
’राज्यले उक्त घटनाको बारेमा निष्पक्ष छानबिन गर्नुपर्छ। सरकारबाट न्यायिक अनुसन्धान भएर दोषीलाई कारबाही नभएमा पीडित परिवारलाई कानूनी उपचारमा सघाउन महानगरपालिका तयार छ,’ मेयर शाहले भनेका छन् ।
उनले पीडित परिवारको पक्षमा कानुनी सहायता उपलब्ध गराउने तथा महानगरको तर्फबाट नियमानुसार आर्थिक सहयोगसमेत प्रदान गरिने जानकारी दिएका छन् । बालेनका स्वकीय सचिव भूपदेव शाहका अनुसार बालेनले व्यक्तिले ज्यान गुमाउने कुरा सामान्य नभएको उल्लेख गर्दै यस्ता आपराधिक घटनाको न्यायिक छानबिन हुनुपर्ने बताएका हुन् ।
‘दोष कुनै पनि पक्षको त्यो तपशीलको कुरा निष्कर्ष न्यायिक छानबिन हुनुपर्छ । तर्क जे भए पनि कोहीले अनाहकमा ज्यान गुमाउनु भएन’, भूपदेवले भेटबारे जानकारी दिँदै सामाजिक सञ्जालमा लेखेका छन् ।
मेयर शाहले तीनकुने घटनामा ज्यान गुमाएका सविन र रजक दुवै परिवारका सदस्यसँग भेट गरेको बताएपनि स्वकीय सचिव भुपदेवले भने महर्जनको परिवारसँग भेट भएको तस्विर मात्रै सार्वजनिक गरेको छ।
यसअघि नेपाली काँग्रेसका सभापति शेरबहादुर देउवाले तीनकुने–घटनामा मृत्युवरण गरेका पत्रकार सुरेश रजकका परिवारलाई भेटेका थिए । सभापति देउवाले रजकको डल्लुस्थित निवासमा पुगेर भेट गर्दै घटनाको सत्यतथ्य छानविन गरी दोषीमाथि कारबाहीका गर्ने आश्वासन दिएका थिए ।
चैत १५ गते काठमाडौँको तीनकुनेमा भएको प्रदर्शनमा रिपोर्टिङ गर्दैगर्दा त्यहाँस्थित एक निजी घरमा लागेको आगोमा जलेर एभिन्युज टेलिभिजनमा कार्यरत पत्रकार रजकको मृत्यु भएको थियो भने महर्जनको प्रहरीको गोली लागेर ज्यान गएको थियो ।
तीनकुने घटनाका विषयमा न्यायिक छानविन गर्न सत्तारुढ दल नेपाली कांग्रेसका महामन्त्री विश्वप्रकाश शर्मा, गगन थापा, सुनिल शर्मा लगायतसहित राप्रपाले माग गरिरहेका छन् । तर सरकारले न्यायिक छानविनको कुनै आवश्यकता नरहेको भन्दै यसको सम्पूर्ण दोष राजावादी र पूर्वराजाले लिनु पर्ने भन्दै उनीहरुमाथि नै थोपरिरहेको छ ।
यस घटनाका सम्लग्न भएको आरोपमा ६ दर्जन ब्यक्तिहरुलाई प्रहरीले पक्राउ गरी अनुशन्धान गरिरहेको छ । जसमा राप्रपा वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणा समेत रहेका छन् । उनीहरुलाई राज्यविरुद्धको कसुर, आपराधि उपद्रव र संगठित अपराधमा प्रहरीले मुद्दा अगाडी बढाएको छ।
प्रहरीले तीनकुनेमा भएको अराजक गतिविधिमा संलग्न रहेको आरोपमा हिजोमात्रै थप ६ जना पक्राउ गरेको छ । सोमबार थप ६ जनालाई अदालतबाट म्याद लिएर हिरासतमा राखिएको प्रहरीले जानकारी दिएको छ।
पक्राउ पर्नेमा सर्लाहीको कबिलासी ६ घर भई हाल ललितपुरको टिकाथली बस्ने २२ वर्षका अमित शाह, सुनसरीको धरान घर भई हाल काठमाडौँ ३१ बस्ने २७ वर्षका दिवश बोगटी क्षेत्री, काभ्रेको नमोबुद्धकी ऐनी भन्ने ३० वर्षकी अनिता कुँवर र सिन्धुपाल्चोकको बाह्रबिसे ९ का ३० वर्षका कुमार तामाङ रहेका छन्।
उनीहरु आगजनी तथा तोडफोडमासमेत संलग्न रहेको प्रहरीको आरोप छ। सीसीटीभी फुटेज तथा अन्य भिडिओहरुमा त्यसदिन उनीहरुले गरेका आपराधि गतिविधिका आधारमा पक्राउ गरेर अनुसन्धान अगाडी बढाएको जिल्ला प्हरी परिसर काठमाडौँका एसपी अपीलराज बोहराले बताएका छन् । आन्दोलनको नेतृत्व गरेका दुर्गा प्रसाईं भने अझै फरार छन्।
