२६ चैत , काठमाण्डौ ।
राजसंस्थासहितको नविन समझदारीका लागि तयार हुन् भन्दै खबरदारी गर्न आन्दोलनमा होमिएको राष्ट्रिय प्रजातन्त्र पार्टीका लागि काठमाडौं महानगरपालिकाका मेयर बालेन्द्र शाह बालेन टाउको दुखाई बनेका छन् । पूर्वराजालाई समेत कसूरदार ठहराई सकेका बालेनले आफूहरुलाई पनि नछाड्ने भन्दै राजावादीहरु सचेत भएका छन् ।
गएको चैत १५को तीनकुने प्रर्दशनका क्रममा फोहोर गरेर वातावरण प्रदूषण गरेको भन्दै पूर्वराजा ज्ञानेन्द्रलाई समेत करिब ८ लाखको जरिवाना पत्र काटेका बालेन आफूहरुलाई पनि पत्र काट्न सक्ने भन्दै राष्ट्रिय प्रजातन्त्र पार्टीका अध्यक्ष राजेन्द्र लिङदेनले बालेनलाई आफ्नो पार्टीले आयोजना गरेको सभामा फोहोर नगरिएको सन्देश दिएका छन् ।
राप्रपाले फोहोर गरेको भनेर पत्र नकाट्न उनले चेतावनी दिए । आजको सभामा आफ्नो भाषण सिध्याइसकेका लिङदेन एउटा कुरा भन्न छुटेछ भन्दै पुनः माइकमा फर्किएका थिए। उनले भने, ‘एउटा सुचना दिन बिर्सिएछ । हाम्रो बालेनजीलाई।। यो काठमाडामैं महानगरभित्र पर्छ होइन ? बालनजीलाई आजको कार्यक्रमका बारेमा धेरै हिरो भएर पत्र नकाट्न म आग्रह गर्छु र हाम्रो साथीहरुलाई आफैं सफा गरेर जान आग्रह गर्छु । एउटा केही फोहोर रहनेवाला छैन । पत्रकार नागरिक समाजले अनुगमन गर्नुहोला, भोलि फोहोर गरेवापत भनेर चिठी नआओस ।’
लिङ्देन अघि पनि मञ्चबाट उद्घोषकले नै फोहोर नगर्न आग्रह गरेका थिए । पार्टी उपाध्यक्ष रोशन कार्कीको भाषण सकिएपछि उद्घोषकले पार्टीको सन्देश सुनाएका थिए । पानीको बोतल जथाभावी नफ्याँक्न उनले सहभागीहरुलाई निर्देशित गरेका थिए , उनले भनेका थिए, ‘एउटा सूचना प्राप्त भएको छ । अलिअलि गरम छ । साथी भाइहरुले पानी पिइराख्नुभएको होला । बोतललाई व्यवस्थित ढंगले राखिदिनुहोला । जथाभावी नफ्याँकिदिनु होला । फेरि एकजना पत्र काट्न तयार भएर बसेको छ । त्यो पत्र आउँछ । पानीको बोतल तपाईंले बोक्नुभएको भए पनि तपाईंको नाम थाहा नभएर राप्रपामा पत्र आउँछ । किन राप्रपालाई पत्र काट्ने बनाउनुहुन्छ ? राष्ट्रवादी कसरी कार्यक्रम गर्छन् भन्ने दृष्टान्त पनि दिनुछ ।’
लिङदेन र आयोजकको फोहोररहित बनाउने सुचना र त्यसको कार्यान्वयनबाट बालेनपनि खुशी भएका छन् । राप्रपाको कार्यक्रम फोहोररहित भएपछि बालेनले धन्यवादसहित भनेका छन्, कसैले फोहोर गर्छन् र जरिवाना तिराउने भनेर महानगर बसेको हुदैन । सार्वजनिक स्थानमा कुनै पनि व्यक्ति, संस्था र कार्यक्रमले फोहोर नगरोस् भन्ने महानगर चाहन्छ । राप्रपाले आजको कार्यक्रममा आफै सरसफाइ गरेकोमा धेरै धेरै धन्यवाद छ ।
यसअघि महानगरबाट बालेनले पूर्वराजालाई चैत १५ को काठमाडौं तीनकुनेको राजा फर्काउने भनिएको आन्दोलनका क्रममा ज्ञानेन्द्रकै निर्देशनमा राजावादी प्रदर्शन भएको भन्दै महानगरको क्षेत्राधिकारभित्रका सार्वजनिक सम्पत्तिमा तोडफोड गरेको र फोहोरमैला गरेको भन्दै ७ लाख ९३ हजार जरिवाना तोकेका थिए ।
तर काठमाडौं महानगरले पूर्वराजा ज्ञानेन्द्र शाहलाई गरिएको जरिवाना तोकेको पत्र निर्मल निवासले फर्काइदिएको थियो । सो जरिवाना पत्र महानगरले हुलाक मार्फत पठाएको छ। तीनकुने प्रर्दशनका क्रममा पूर्वराजालाई जरिवना पत्र काटिएको भन्दै लिङदेनसहित राजावादीहरुले बालेनको आलोचना गर्दै आएका छन् ।
यसअघि बालेनले फागुन २५ को ज्ञानेन्द्रको स्वागत गर्ने कार्यक्रममा समेत फोहोर गरिएको भन्दै राप्रपालाई १ लाख जरिवाना तिराएका थिए । सो जरिवाना पार्टी प्रवक्ता ज्ञानेन्द्र शाहीले नै बुझाएका थिए ।
त्यसअघि एमालेले दरबारमार्गमा गरेको शक्ति प्रर्दशनमा समेत फोहोर गरेको भन्दै १ लाख जरिवानाको पत्र काटिएको थियो । तर एमालेले अहिलेसम्म पनि त्यो जरिवाना तिरेको छैन् ।
