१६ असार , काठमाण्डौ ।
गएरातिदेखि परेको अविरल वर्षाका कारण धनगढी उपमहानगरपालिका लगायत सुदूरपश्चिमका कञ्चनपुर र कैलाली जिल्लाका अधिकांश क्षेत्र जलमग्न भएका छन् ।
वर्षापछि धनगढीको मुख्य सडक क्षेत्र, रातोपुल, हसनपुर, शिवनगर, विशालनगर लगायतका क्षेत्र डुबानमा परेका छन् । विभिन्न वडाका टोलहरू डुबानमा परेपछि स्थानीयहरू समस्यामा परेका छन् ।
जल तथा मौसम विज्ञान विभागको तथ्याङ्क अनुसार धनगढी विमानस्थलको स्टेसनमा पछिल्लो २४ घण्टामा २०२.२ मिलिमिटर वर्षा मापन भएको छ । विभागले खतराको सङ्केत नै जारी गरेको हो ।
उपमहानगरपालिकाको वडा नम्बर ८ र १२ लगायतका टोलका अधिकांश घरमा पानी पसेपछि स्थानीयहरूको सामानमा क्षति पुगेको छ । वडा नम्बर ८ को शिक्षानगर डुबानको चपेटामा छ ।
घरभित्र पानी पसेपछि अन्नपातदेखि सबै सामानहरुमा ठुलो नोक्सानी भएको छ । स्थानीयहरुको लाखौँ क्षति भइसकेको छ । उता धनगढी–१२ पनि पुरै डुबानमा छ । बजारको मुख्य सडक पनि डुबानमा छ ।
सुरक्षाकर्मीले उद्धारको काम गरिरहेका छन् । कञ्चनपुरको कृष्णपुर, बेलौरीमा पनि डुबान छ । सुदूरपश्चिमका तराईका जिल्लामा डुबानमा परेका छन् । पहाडी जिल्लामा पनि वर्षा जारी छ ।
सेती नदिमा पानीको वहाव बढेपछि बैतडीको सिगास –५ ढुङ्गाढका स्थानीय त्रसित छन्। खोला तथा नदीहरुमा पानीको बहाव बढेपछि डुबान भएको छ । अहिलेसम्म ठुलो क्षतिको घटना भने नआएको सुदूरपश्चिम प्रदेश प्रहरीले जनाएको छ।
विपदको समयमा सावधानी र सुरक्षा अपनाउन प्रशासन सबैलाई आग्रह गरेको छ । सुदूरपश्चिमका कञ्चनपुर र कैलाली जिल्लामा बाढीको उच्च जोखिम रहेको जल तथा मौसम विज्ञान विभागले जनाएको छ ।
पछिल्लो २४ घण्टामा बेलौरीको शान्तिपुरमा २६४.६ मिलिमिटर र कृष्णपुरमा १८४ मिलिमिटर वर्षा मापन भएको छ । महाकाली, मोहना, मछेली, दोदा, स्याली, चौधर लगायत नदी तथा खोलाहरूमा पानीको सतह उल्लेख्य रूपमा बढेको छ ।
विभागले नदी तटीय क्षेत्र र डुबान क्षेत्रका बासिन्दाहरूलाई सुरक्षित स्थानमा जान र विशेष सतर्कता अपनाउन आग्रह गरेको छ ।
जिल्ला प्रशासन कार्यालयले पनि नदी र खोलानालाको सतह सतर्कता तह पार गर्दै गएको भन्दै आवश्यक सतर्कता अपनाउन सार्वजनिक सूचना जारी गरेको छ ।
देशभर मनसुनी वायूको प्रभाव कायम रहँदा सुदूरपश्चिम प्रदेशमा अझै केही घण्टा निरन्तर वर्षा हुने सम्भावना रहेको मौसमविद्हरूले बताएका छन्।
बाढी, डुबान र भू–क्षयको जोखिम उच्च रहेकाले स्थानीय प्रशासन र मौसम विभागले सतर्कता अपनाउन आह्वान गरेका छन् ।
कञ्चनपुर जिल्लाको अधिकांश स्थानमा भारी वर्षा भइरहेको र थप वर्षा हुन सक्ने बाढी पूर्वानुमान महाशाखाले जानकारी दिएको छ ।
मंगलबार बिहानसम्म उच्च सतर्कता अपनाउन विभागले आग्रह गरेको छ । विभागअन्तर्गतको मौसम पूर्वानुमान महाशाखाले कञ्चनपुरको बेलौरीमा ‘अति भारी’ वर्षा भएको जनाएको थियो ।
