आफ्नै पार्टीका सांसदले गरे ट्रम्पको विधेयकविरूद्ध मतदान

अमेरिकी सिनेटमा घण्टौँको गतिरोध, संघर्ष र रस्साकसीपछि राष्ट्रपति डोनाल्ड ट्रम्पको कर र खर्चसम्बन्धी विधेयक झिनो मतले पारित भएको छ ।

जसलाई लिएर इलोन मस्कले पनि निकै विरोध गरेका थिए । यो विल पास भयो भने आफूले नयाँ पार्टी खोल्नेसम्मको चेतावनी उनले दिएका थिए ।

र यो पास गराउने सिनेटरहरुलाई लाज लाग्नु पर्ने भन्दै कटाक्ष गरेका थिए । यसको बावजुद विधेयकले एक प्रमुख अवरोध पार गरेको हो। तर यसमा ट्रम्पले आफ्नै पार्टीका सिनेटरहरुको पनि विरोध खेप्नु परेको छ ।

अमेरिकी सिनेटमा २४ घण्टाभन्दा बढीको बहसपछि यो विधेयक पारित भएको हो । तर, सत्तारुढ रिपब्लिकन पार्टीभित्र फुट देखियो । यो विधेयक ‘वान बिग ब्युटिफुल बिल एक्ट’को मतदानमा पक्ष र विपक्षमा बराबर मत परेपछि उपराष्ट्रपति जेडी भान्सले ‘टाई–ब्रेकिङ’ मत दिँदा पारित भएको हो ।

रिपब्लिकन बहुमत भएको सिनेटमा विधेयकबारे मतदान हुँदा पक्ष र विपक्ष दुवैमा ५०–५० मत परेको थियो । सामान्य अवस्थामा उपराष्ट्रपतिले विधेयक पारित गर्ने सन्दर्भमा मतदान गर्दैन ।

बराबरी भएको अवस्थामा उपराष्ट्रपतिले निर्णायक मतदान गर्न पाउँछन् भनेर अन्तर्राष्ट्रिय सञ्चारमाध्यमहरूले जनाएका छन् । भान्सले मतदान गरेपछि ट्रम्पले ठूलो र सुन्दर (बिग ब्युटिफुल बिल) भन्दै आएका उक्त विधेयक सिनेटबाट ५१–५० को झिनो अन्तरले पारित भएको थियो ।

यो विधेयक अब तल्लो सदन कंग्रेसमा फर्किनेछ, जहाँ यसले अझै विरोधको सामना गर्नुपर्ने समाचारमा उल्लेख छ । यसअघि तल्लो सदन कंग्रेसमा रिपब्लिकनहरूले यो विधेयकलाई एक मतको झिनो अन्तरले पारित गरेका थिए ।

ट्रम्पले रिपब्लिकन नियन्त्रित कंग्रेसलाई यो विधेयकको अन्तिम संशोधनलाई ४ जुलाईसम्म कानुनमा हस्ताक्षर गर्न पठाउन समयसीमा दिएका छन् । “संशोधनसहितको विधेयक पारित भएको छ,” भान्सले मंगलबार भने, जुन क्षणमा सिनेट रिपब्लिकनहरूले ताली बजाए ।

पार्टी एकजुट गर्ने प्रयासका बाबजुद तीन रिपब्लिकन सिनेटरले यो विधेयकलाई समर्थन दिएनन् । उनीहरूले विधेयकको विपक्षमा मतदान गरेका थिए । दिनभरीको वार्तापछि, रिपब्लिकन नेताहरूले अलास्काकी सिनेटरको समर्थन लिन सफल भएका थिए ।

जसले आफ्नो राज्यमा मेडिकेड कटौतीलाई लिएर समर्थन रोकेकी थिइन् । विधेयक पारित भएपछि ट्रम्पले भने, ‘यो एक उत्कृष्ट विधेयक हो । यसमा सबैका लागि केही न केही छ।’ राष्ट्रपतिको हस्ताक्षरसँगै यो विधेयक कानुन बन्नेछ ।

सामाजिक कार्यक्रममा खर्च कटौती हुने भएकाले यस विधेयकबारे धेरै विवाद छ । यो त्यही विधेयक हो जसका कारण ट्रम्प र उनलाई चुनाव जिताउने अर्बपति इलन मस्कबीच भनाभन भएको थियो ।

पछि उनीहरुको झगडा मस्कले पछुतो जाहेर गरेपछि सुलह भएको थिया े। तर सिनेटमा विधेयक पुगेपछि मस्कले फेरि ट्रम्पसँग वाकयुद्ध सुरू गरेका थिए । उनले विधेयक पारित भए नयाँ पार्टी खोल्ने चेतावनी दिएका थिए ।

ट्रम्पले जबाफमा ट्रम्पले मस्कका कम्पनीहरूलाई दिएको सरकारी अनुदान कटौती गर्ने धम्की दिएका छन् । ट्रम्पले मस्कलाई ‘दोकान बन्द गरेर दक्षिण अफ्रिका फर्कनुपर्ने’ चेतावनी समेत दिएका थिए ।

विधेयक सिनेटले पारित गरे पनि मस्कले नयाँ पार्टीबारे भने अभिव्यक्ति दिएका छैनन् । यता यो विधेयकले स्वास्थ्य बीमा कार्यक्रमको कटौती, धनीहरूलाई कर लाभ, ग्रामीण अस्पतालहरू बन्द हुने, वैदेशीक ऋण, नवीकरणीय ऊर्जामा दिएको प्रोत्साहन खारेज गर्ने व्यवस्था रहेकाले धेरै रिपब्लिकनहरूले यसको पक्षमा मतदान गरे पनि तीन जनाले यसको विरोध जनाएका हुन् ।

विधेयक प्रतिनिधि सभा (हाउस अफ रिप्रिजेन्टेटिभ)मा पठाइएको छ । त्यहाँ रिपब्लिकनहरूको २२०–२१२ को झिनो बहुमत छ । प्रतिनिधि सभामा पनि रिपब्लिकनै सदस्यहरू उक्त विधेयकको विपक्षमा रहेका कारण त्यहाँ पनि ठूलो लडाइँ हुने निश्चित रहेको भनेर अन्तर्राष्ट्रिय सञ्चारमाध्यमहरूले जनाएका छन् ।

https://www.youtube.com/watch?v=tNXUTPTZyAQ