२० असार, काठमाडौं ।
धनुषामा प्रहरी र तस्कर समूहबीच भिडन्त भएको छ । विदेह नगरपालिका–२ वैदेहीमा बिहीबार साँझ ७ बजे भएको झडपमा सातजना सशस्त्र प्रहरी घाइते भएका छन् ।
“वैदेहीको दुहबीस्थित नेपाल–भारत सीमानजिक भिडन्त हुँदा सातजना सशस्त्र प्रहरी घाइते हुनुभएको छ,” जिल्ला प्रहरी कार्यालय धनुषाका डीएसपी वजरुणबहादुर सिंहले भने, “घाइतेको अवस्था सामान्य रहेको छ ।”
भिडन्तमा चार राउन्ड गोली र १३ सेल अश्रु ग्यास प्रहार भएको उनले जानकारी दिए । “शंका लागेर प्रहरीले सीमा क्षेत्रका घरमा खानतलास लिँदा तस्करहरूले आक्रमण गरेका हुन्,” डीएसपी सिंहले भने, “तस्करहरू कोही पनि नियन्त्रणमा छैनन् ।”
तस्करको थप आक्रमणबाट जोगिन सशस्त्र प्रहरीले हवाई फायर गरेको बताएको छ । गोबराही क्षेत्रमा अवैध सामान लुकाई छिपाई राखेको भन्ने सूचनाको आधारमा गएको सशस्त्र प्रहरी बल नेपाल नम्बर ८ गण धनुषा र प्रस्तावित सीमा सुरक्षा गुल्म महिनाथपुरबाट खटिएको टोलीमाथि तस्कर समूहले आक्रमण गरेका हुन् ।
अवैध सामान खोजतलास गर्ने क्रममा सशस्त्रले एउटा मोटरसाइकल फेला पारेको थियो । नजिकै रहेको टहरोमा समेत खोजतलास गर्ने क्रममा अन्दाजी डेढ सयको संख्यामा लुखिछिपी बसेका तस्कर समूहले घरेलु हातहतियार सहित सशस्त्र प्रहरीमाथि आक्रमण गरेका थिए।
उनीहरुबाट भएको ढुंगामुढाका क्रममा ६ जना सशस्त्र प्रहरी घाइते भएका हुन् । स्थितिलाई नियन्त्रणमा लिन सशस्त्र प्रहरीले १३ राउण्ड ग्यास सेल र ४ राउण्ड हवाई फायर समेत गरेको हो ।
घाइते प्रहरीलाई उपचारको लागि प्रादेशिक अस्पताल जनकपुर लगिएको छ । झडपमा सशस्त्र प्रहरी बलका प्रहरी नायब उपरीक्षक डिएसपी दिनेश शर्मालगायत सुरक्षाकर्मी घाइते भएका छन् ।
तस्कर समूहले भारतीय भूभागतर्फबाट प्रवेश गरी सामग्री ल्याउने प्रयास गरिरहेका थिए । तिनै सामग्री नियन्त्रणमा लिने क्रममा झडप भएको हो । भिडन्तपछि तस्कर समूह घटनास्थलबाट फरार भएका छन् ।
घटनाबारे थप अनुसन्धान र आवश्यक कारबाहीका लागि सुरक्षा संयन्त्र परिचालन गरिएको डीएसपी सिंहले बताएका छन् । दुहबी भारतीय सीमा क्षेत्र मै जोडिएको छ । यो नाकामा तस्करी नियन्त्रणमा पुग्ने प्रहरीमाथि यसअघि पनि पटक पटक आक्रमण भएको थियो ।
