२३ असार , काठमाडौं।
भिजिट भिसामा मानव तस्करी गरिएको भन्दै प्रतिपक्ष दल रास्वपा र राप्रपाले गृहमन्त्री रमेश लेखकको राजीनामा र उच्चस्तरीय छानविन समितिको माग गर्दै संसद अवरोध गर्दै बहिष्कार नै गर्दै आइरहेका बेला प्रधानमन्त्री केपी शर्माओलीको भर्खरै सम्पन्न स्पेन भ्रमणमा समेत मानवतस्करी भएको गम्भिर आरोप लागेको छ ।
नेकपा माओवादी केन्द्रका वाईसीएल इञ्चार्ज रामप्रसाद सापकोटा दिपशिखाले प्रधानमन्त्री केपी शर्मा ओलीमाथि मानवतस्करीसँग जोडेर गम्भिर प्रश्न खडा गरेका छन्।
दिपशिखाले लेखेका छन्,‘प्रधानमन्त्री जी तपाई स्पेन भ्रमणमा जाँदा केहि मानिसहरू लगेको र उतै छोडेर फर्किएको भन्ने आरोप छ। कति गएका र कति फर्केका हुन् जनतालाई जवाफ चाहियो ! प्रधानमन्त्रीको भ्रमणमा समेत मानव तस्करीको आरोप लाग्नु जत्तिको लज्जा रास्ट्रका लागि अरू के हुन्छ र?’
उनले सामाजिक सञ्जालमार्फत खडा गरेको प्रश्न भिजिट भिसा प्रकरणको बहस चलिरहेका बेला गम्भिर बन्न पुगेको छ । सामाजिक संजालमा दिपशिखाले प्रधानमन्त्रीमाथि आरोप लागेको बताएपनि त्यस्तो गम्भिर आरोप कसले र कहाँ लगायो भन्ने विषय उल्लेख गरेका छैनन् ।
प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाल प्रचण्डनिकट रहेको र केन्द्रीय सदस्य तथा युवा फाँटको प्रमुख समेत भएकाले दिपशिखाको आरोप गम्भिर हो।
एमालेका नेताहरुले भने प्रधानमन्त्रीको भ्रमणलाई जोडेर यस्तो अफवाह फैलियो र प्रमाणित भएन भने राम्रो नहुने चेतावनी दिएका छन्।
रामप्रसादले सामाजिक संजालमार्फत प्रधानमन्त्रीसँग जवाफ मागेपछि उनीमाथि पनि सामाजिक संजालमा मानवतस्करी गरेको भन्दै प्रश्न उठाइएका छन् ।
स्पेनमा आयोजना भएको संयुक्त राष्ट्रसंघको कार्यक्रममा नेपालबाट झण्डै तीन दर्जन मानिस नेकपा माओवादी निकट ब्यवसायीले भिजिट भिसामा मड्रिट लगेको कुरा स्पेनबाट जानकारीमा आएको सामाजिक संजालमा दाबी गरिएको छ ।
प्रधानमन्त्री केपी शर्मा ओली जाने कार्यक्रम भएको र स्पेनमा भिसाबिनै जान पाउने अवस्थाको दुरुपयोग गरेर स्पेन लगेको र त्यस्को संयोजन स्पेनमै रहेका माओवादी निकट ब्यवसायी चितवनतिरका कँडेल थरका ब्यक्ति हुन भन्ने पनि जानकारीमा छ ।
ती कँडेल थरका ब्यक्ति माओवादी नेता र वाइसिएलको नाममा असुलीमा कुस्त भएका भनिएका दीपशिखाकै निटकका मानिस हुन भन्ने तथ्य पनि खुलेको सामाजिक संजालमा रामप्रसादलाई आरोप लगाउँदै लेखिएको छ ।
यस्तै एमाले निटक प्रेस चौतारीमा अध्यक्ष गणेश पाण्डेले त सापकोटाविरुद्ध जाहेरी परेको उल्लेख गरेका छन् । उनले लेखेका छन्, माओवादी केन्द्रका वाइसिएल इञ्चार्ज रामप्रसाद सापकोटा उर्फ दिपशिखाले विदेशमा मान्छे पठाउने भनेर एक करोड डिल गरेको उजुरी परेको छ ।
जनता–जनयुद्धको नाममा राजनीति गरेर ठूला पदमा पुगेका मानिसले आज मान्छे बेच्ने धन्दा गर्न थाले भने यो त आन्दोलनको घोर अपमान हो । तर अहिलेसम्म दिपशिखाकाविरुद्धमा जाहेरी परेको विषयमा प्रहरीले भने अनविज्ञता जनाएको छ ।
प्रधानमन्त्री ओली संयुक्त राष्ट्रसङ्घको ‘विकासका लागि वित्तसम्बन्धी चौथो अन्तर्राष्ट्रिय सम्मेलन’ (एफडीडी–४) मा २१ जना नेपाली प्रतिनिधिमण्डलको नेतृत्व गर्दै असार १४ देखि २० गतेसम्म ६ दिने स्पेन भ्रमण गरेका थिए ।
कुल २१ सदस्यीय भ्रमण दलमा प्रथम महिला राधिका शाक्य, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र मन्त्रालयका सचिव अमृतबहादुर राई, अर्थ मन्त्रालयका सचिव घनश्याम उपाध्याय, प्रधानमन्त्री तथा मन्त्रिपरिषद् कार्यालयका सचिव राजकुमार श्रेष्ठ, प्रधानमन्त्रीका प्रमुख स्वीकय सचिव राजेश बज्राचार्य, प्रधानमन्त्रीका निजी चिकित्सक डा. स्मृति शाक्य, परराष्ट्र मन्त्रालयका सहसचिव कृष्णप्रसाद ढकाल, अर्थ मन्त्रालयका सहसचिव धनीराम शर्मा, परराष्ट्र मन्त्रालयका शिष्टाचार महापाल कुमारराज खरेल लगायत सहभागी थिए ।
स्पेनमा काठमाडौँबाट २१, स्पेन र न्यूयोर्कबाट आठ गरी २९ जना नेपाली प्रतिनिधिमण्डल सहभागी रहेको परराष्ट्र मन्त्रालयले जनाएको छ ।
भ्रमण दलमा स्पेनका लागि नेपाली राजदूत शनिल नेपाल, संयुक्त राष्ट्रसङ्घका लागि नेपालको स्थायी नियोगका स्थायी प्रतिनिधि लोकबहादुर थापा लगायत सहभागी रहेका थिए ।
