१८ साउन , काठमाण्डौ ।
आफ्नो देश नजिकै दुई परमाणु पनडुब्बी तैनाथ गर्ने निर्णयमा अमेरिकालाई रुसले जवाफ फर्काएको छ । अमेरिकी राष्ट्रपति डोनाल्ड ट्रम्पको सो निर्णयमा रूसी सांसदले कडा जवाफ दिएका छन् ।
रूसी सांसद भिक्टर भोडोलात्स्कीले आफ्नो देशसँग पहिलेदेखि धेरै न्युक्लियर पनडुब्बीहरू रहेका बताएका छन् । त्यसले अमेरिकाका दुई पनडुब्बी सम्हाल्न सक्ने उनको भनाइ छ ।
भिक्टरले भनेका छन्, “विश्वका महासागरहरूमा रूसका परमाणु पनडुब्बीहरूको संख्या अमेरिकाको भन्दा धेरै छ । ट्रम्पले पठाइरहेका ती दुई पनडुब्बी पहिलेदेखि नै हाम्रो निसानामा छन् । त्यसैले अब यसमा छुट्टै प्रतिक्रिया दिनु आवश्यक छैन ।”
पनडुब्बीको स्थानान्तरणबारे ट्रम्पले भनेका थिए, “हामीलाई यो गर्नैपर्ने थियो । हामीले केवल सावधान हुनुपर्छ । हामीलाई धम्की दिइएको थियो । हामीलाई यो उचित लागेन । त्यसैले म धेरै सावधान हुनुपर्छ ।”
उनले भने, “म यो मेरो जनताको सुरक्षाका निम्ति गरिरहेको छु । जब परमाणु शक्तिको कुरा आउँछ, हामी तयार हुनुपर्छ ।” ट्रम्पले दिमित्री मेद्भेदेभलाई असफल पूर्वरूसी राष्ट्रपति भनेका थिए । जवाफमा मेद्भेदेवले भने, “ट्रम्प रूससँग अल्टिमेटमको खेल खेलिरहेका छन् । उनले रूस न त इजरायल हो न इरान हो भनेर सम्झनुपर्छ । प्रत्येक नयाँ अल्टिमेटम युद्धतर्फ लैजाने कदम हो ।”
त्यसपछि नै ट्रम्पले रूसनजिकै परमाणु पनडुब्बी तैनाथ गर्ने आदेश दिएका थिए । यता मेद्भेदेभलाई क्रेमलिनका सबैभन्दा प्रमुख पश्चिमा विरोधी नेता बनेको आरोप लाग्न थालेको छ ।
जबकी कुनै समय उनलाई उदारवादी रूसी नेताका रूपमा हेरिन्थ्यो ।
सन् २००८ देखि २०१२ सम्म राष्ट्रप्रमुखको जिम्मेवारी सम्हालेका ५९ वर्षीय मेद्भेदेभले आफ्नो एकल कार्यकालमा युरोप र संयुक्त राज्य अमेरिकासँग ‘मैत्रीपूर्ण’ सम्बन्ध राख्न चाहेका देखिन्थ्यो तर राष्ट्रपति भ्लादिमिर पुटिनलाई उक्त पद हस्तान्तरण गरेपछि उनी ओझेलमा परेका थिए ।
सन् २०१२ मा राष्ट्रपतिबाट प्रधानमन्त्री बनाइएका मेद्भेदेभलाई सन् २०२० मा रुसको सुरक्षा परिषद्को उपप्रमुख बनाइएको थियो । मस्कोले युक्रेन आक्रमण सुरु गरेलगत्तै मेद्भेदेभले सामाजिक सञ्जालमा कट्टरपन्थी विचार राख्न थालेका थिए ।
द्वन्द्व सुरु भएदेखि नै सार्वजनिक वक्तव्यहरूमा उनले पश्चिमाहरूलाई ‘हरामी र पतित’ को रूपमा वर्णन गरेका थिए । उनले युद्ध सुरू भएपछि ‘युक्रेन, निःसन्देह, रूस हो’ भनेका थिए ।
उनले रूसका शत्रुविरुद्ध आणविक हतियार प्रयोग गर्ने सम्भावना रहेको भनी युरोपलाई आतङ्कित पार्ने काम पनि गरेका थिए । गत जुन महिनामा अमेरिकाले मस्को समर्थित इरानको आणविक केन्द्रहरुमा हवाई आक्रमण गरेपछि मेद्भेदेभले तेहरानलाई आणविक हतियार उपलब्ध गराउन ‘धेरै देश’ इच्छुक रहेको बताएका थिए ।
मेद्भेदेभले बिहीबार टेलिग्रामपोस्टमा मस्कोको सेमी अटोमेटिक ‘डेड ह्यान्ड’ आणविक हतियार नियन्त्रण प्रणालीलाई सङ्केत गर्दै ट्रम्पको आलोचना गरेका थिए ।
मेद्भेदेभका आलोचकहरूले उनको पोस्टलाई रुसको भीडभाड भएको कुलीन वृत्तमा राजनीतिक सान्दर्भिकता कायम राख्ने प्रयासको रूपमा अथ्र्याएका थिए तर अमेरिकी राष्ट्रपति ट्रम्पले यो धम्कीलाई गम्भीरतापूर्वक लिएको बताएका छन् ।
‘रूसी नेताको अत्यधिक उत्तेजक भनाइका कारण मैले दुई आणविक ‘पनडुब्बी’हरूलाई उपयुक्त क्षेत्रमा तैनाथ गर्न आदेश दिएको छु’, ट्रम्पले शुक्रबार भने, ‘यी मूर्खतापूर्ण र भड्काउ भनाइहरू यस कदमका लागि जिम्मेवार छन्।’
यसअघि जुलाई २८ मा स्कटल्यान्ड भ्रमणका क्रममा ट्रम्पले युक्रेन युद्ध अन्त्य गर्न रुससँग १० देखि १२ दिनको समय रहेको घोषणा गरेका थिए ।
यस अविधमा रुसले युद्धविराम वार्ता गर्न सहमत भएन भने रुससँग व्यापार गर्ने देशमा ’माध्यमिक शुल्क’ लगाइने बताएका थिए।
