१७ भदौ , काठमाण्डौ ।
गृहयुद्ध र चरम भोकमरीको चपेटामा रहेको सुडानमा यतिबेला प्राकृतिक महाविपत्ति आइलागेको छ । भीषण पहिरोले सुडानलाई स्तब्ध पारेको छ । दर्जनौं, सयौं होइन एक हजारबढी सुडानीहरु एकैसाथ पहिरोमा पुरिएर ज्यान गुमाएका छन् ।
सुडानको पश्चिमी क्षेत्रमा पहिरो जाँदा कम्तीमा १ हजार जनाको मृत्यु भएको त्यहाँको विद्रोही संगठन सुडान लिबरेशन मुभमेन्ट (आर्मी)ले जनाएको छ । बीबीसीका अनुसार, यो घटना पश्चिमी सुडानको मर्रा पर्वतस्थित टाढाको क्षेत्रमा भएको हो ।
संगठनका अनुसार लगातार धेरै दिनसम्म परेको भारी वर्षाका कारण ३१ अगस्टमा पहिरो गएको हो । यसमा तारासिन गाउँको ठूलो हिस्सा विनाश भएको छ । ‘प्रारम्भिक विवरणअनुसार गाउँका सबै बासिन्दाको मृत्यु भएको छ, जसको संख्या १ हजार भन्दा बढी हुने अनुमान छ ।
केवल एक जना मात्र जीवित छन्,’ समूहले जारी गरेको विज्ञप्तिमा उल्लेख छ । विद्रोहीहरूले संयुक्त राष्ट्रसंघ र अन्तर्राष्ट्रिय सहायता निकायहरूसँग पीडितहरूको शव उद्धार तथा राहतका लागि सहयोग गर्न अपिल गरेका छन् । मृतकमध्ये बालबालिका पनि रहेका छन् ।
सुडानमा तीन वर्षदेखि चलिरहेको गृहयुद्धले देशलाई विश्वकै भीषणतम मानवीय संकटमध्ये एकमा धकेलेकै बेला यो प्राकृतिक विपत्ति थपिएको हो । अल जजिराका अनुसार, दारफुरका केही भागमा भने पहिले नै भोकमरी घोषणा भइसकेको छ ।
समाचार संस्था रोयटर्सका अनुसार, उक्त क्षेत्रमा खाद्यान्न र औषधि अभाव भएको छ । सुडान लिबरेशन मुभमेन्ट÷आर्मीको नियन्त्रणमा रहेको क्षेत्रमा पहिरो गएको हो । यो संगठन सुडानको सेनासँगै मिलेर अर्धसैनिक ¥यापिड सपोर्ट फोर्सेस (आरएसएफ) विरुद्ध लडिरहेको छ ।
उक्त युद्धकै कारण उत्तर दारफुर राज्यका धेरै बासिन्दाले मर्रा पर्वत क्षेत्रमा शरण लिएका थिए । अप्रिल २०२३ मा सुडानको सेना र आरएसएफबीच सुरु भएको गृहयुद्धले देशलाई भोकमरीतिर धकेलिरहेको छ । पश्चिमी दारफुर क्षेत्रमा जातीय संहारका घटना भइरहेका आरोपहरू लागिरहेका छन् ।
गृहयुद्धमा मारिएका मानिसहरूको संख्या फरक–फरक बताइन्छ । तर एक अमेरिकी अधिकारीले गत वर्ष करिब १ करोड ५ लाख मानिसको मृत्यु भइसकेको आकलन गरेका थिए । युद्धका कारण करिब १ करोड २ लाख मानिस आफ्नो घर छोड्न बाध्य भएका छन् ।
सुडानमा ५ करोडभन्दा बढी मानिस भोकमरीको चपेटामा छ । यता अफगानिस्तानको पूर्वी क्षेत्रमा गएको भूकम्पमा परेर अहिलेसम्म ८०० भन्दा बढी मानिसको मृत्यु भइसकेको छ भने हजारौँ घाइते भएका छन् । बाँचेकाहरूले खुला आकाशमुनि रात बिताएका छन् । उद्धार कार्य अझै जारी रहेको छ ।
आइतबार राति गएको ६.० म्याग्निच्युडको भूकम्पमा परेर मृत्यु हुनेमा अधिकांश कुनार प्रान्तका छन् । भूकम्पको केन्द्रबिन्दु नजिकै रहेको उक्त पहाडी गाउँ ध्वस्त भएकाले मृतकको संख्या अझै बढ्नसक्ने अधिकारीहरूले बताएका छन् ।
वर्षौ युद्धको चपेटामा परेको अफगानिस्तानमा पनि गम्भीर खडेरी, सहायता कटौती र विश्व खाद्य कार्यक्रमले भोकमरीको संकट हुने भनेको अवस्थामा यो विपत्ति थपिएको बताइएको छ । भूकम्प गएको क्षेत्रमा विगत केही दिनदेखि भीषण बाढी र पहिरो पनि गएको थियो जसले गर्दा धेरै क्षेत्रहरूमा पुग्ने बाटो बन्द भएको छ ।
