२ कार्तिक , काठमाण्डौ ।
देशका प्रमुख राजनीतिक दलहरूले निर्वाचनको वातावरण नभएको आरोप लगाइ रहेका बेला आज सरकारले निर्वाचन केन्द्रित सुरक्षा बैठकको आयोजना गरेको छ । जेन–जी आन्दोलनपछि बनेको प्रधानमन्त्री सुशीला कार्की नेतृत्वको सरकारले अब आफ्नो ध्यान निर्वाचनतर्फ केन्द्रित भएको सङ्केत दिएको छ।
सरकारले राजनीतिक दलसँग छलफल गरी सकेको छ । आज सुरक्षा प्रमुखहरू सँग निर्वाचनको तयारी, वर्तमान सुरक्षा अवस्था र भावी रणनीतिका बोरमा छलफल गर्न लागेको हो ।
गृहमन्त्रीको अध्यक्षतामा हुने आजको सुरक्षा समिति बैठकमा गृह र रक्षा सचिवसहित चार वटा सुरक्षा निकायका प्रमुख सहभागी हुनेछन्। । प्रधानमन्त्री कार्यालयले जारी गरेको विज्ञप्तिअनुसार, बैठकले एकीकृत निर्वाचन सुरक्षा योजनाको समीक्षा र नीतिगत निर्देशन दिनेछ।
गृह मन्त्रालयको शान्ति, सुरक्षा र अपराध नियन्त्रण महाशाखाको नेतृत्वमा बनेको एकीकृत निर्वाचन सुरक्षा समितिले जिल्ला स्तरका निकायसँग समन्वय गरेर कार्यान्वयन अघि बढाउनेछ।
जिल्ला स्तरमा पनि सिडिओको नेतृत्वमा जिल्ला एकीकृत निर्वाचन सुरक्षा समिति गठन भइसकेको र ती समितिहरूले काम सुरु गरिसकेको उल्लेख छ। गत साता प्रमुख राजनीतिक दलका नेताहरूसँग प्रारम्भिक परामर्श अघि बढाएको सरकारले आइतबारदेखि निर्वाचन सुरक्षा रणनीति कार्यान्वयनमा लैजाने तयारी गरेको छ।
यसै बिच प्रधानमन्त्री कार्कीले शनिवार अपराह्न सामाजिक सञ्जाल एप्स९पूर्व ट्विटर० मा राष्ट्रपतिको उपस्थितिमा चार वटै सुरक्षा निकायका प्रमुखहरूसँग भएको छलफलबारे जानकारी दिँदै लेखेकी छन् ।
राष्ट्रपतिको आह्वानमा प्रधानमन्त्री र मन्त्रीहरूको उपस्थितिमा शीतल निवासमा भएको गहन छलफल निर्वाचनका लागि राजनीतिक वातावरण बनाउने र सुरक्षा सुदृढ पार्ने विषयमा केन्द्रित थियो।
उनका अनुसार छलफलमा निर्वाचनको पूर्व तयारी, राजनीतिक स्थायित्व र सुरक्षा संयन्त्रको मनोबलबारे समीक्षा गरिएको थियो। प्रधानमन्त्रीले लेखेकी छन्, सबै सुरक्षा निकायका प्रमुखहरूले उच्च मनोबलका साथ निर्वाचन सुरक्षामा तयार रहेको जानकारी दिएका छन् । राष्ट्रपति कार्यालयको पहलमा सुरु भएको राजनीतिक दल र जेन–जी पुस्ताका प्रतिनिधिबिचको संवाद पछि सरकारले दलगत तहमा प्रत्यक्ष भेटघाट बढाएको छ।
प्रधानमन्त्री कार्कीले माओवादी केन्द्रका नेताहरू नारायणकाजी श्रेष्ठ र वर्षमान पुनसँग भेट गरिसकेकी छन्। उनका अनुसार यो साताभित्र अन्य दलका शीर्ष नेताहरूसँग पनि छलफल विस्तार गरिँदै छ।
“निर्वाचनको वातावरण बनाउन राजनीतिक तहबाटै पहलकदमी लिइएको छ,” प्रधानमन्त्री कार्कीले एप्समा लेखेकी छन् “दलहरूसँगको संवादको औपचारिक सुरुवात भइसकेको छ।”
प्रधानमन्त्री कार्कीले सहज राजनीतिक निकासका लागि सबै पक्षलाई निर्वाचनमा सहभागी हुन आग्रह गरेकी छन्। । उनको सचिवालयले जारी गरेको विज्ञप्तिमा भनिएको छ “सरकारले निर्वाचनलाई प्राथमिकतामा राखेर आफ्ना गतिविधि केन्द्रित गरेको छ।”
“हामी पूर्ण क्षमताका साथ निर्वाचन तयारीमा जुटेका छौँ। एकीकृत निर्वाचन सुरक्षा योजना तीव्र गतिमा बन्दै छ। निर्वाचन आयोगसँग सघन छलफल र समन्वय भइरहेको छ, र सुरक्षा निकायलाई आवश्यक स्रोत–साधन अभाव नहुने गरी काम भइरहेको छ।”
