२ कार्तिक , काठमाण्डौ ।
आफूले चाहे विश्वको जुनसुकै कुनाको युद्ध पनि रोक्न सक्ने साथै नयाँ तनावसमेत सृजना गराइदिन सक्ने बताउँदै आएका अमेरिकी राष्ट्रपति डोनाल्ड ट्रम्प स्वयं भने आफ्नै देशमा विरोधीहरुले घेरिएका छन् ।
यो विरोध प्रतिष्पर्धी दल वा उनको विजनेश राइभलले नभई सिंगो देशबासीले गरिरहेका छन् । आम अमेरिकी यतिबेला देशैभर ट्रम्पको नीतिको विरोधमा उत्रिएका छन्। अमेरिकाका धेरै शहरहरूमा राष्ट्रपतिविरुद्ध प्रदर्शन सुरू भएको छ ।
राजधानी वाशिंगटन डीसी, न्यूयोर्क, शिकागो, मायामी र लस एन्जलसजस्ता शहरहरूमा प्रदर्शन सुरू भएको हो । शनिबार बिहान न्यूयोर्क शहरको प्रतिष्ठित टाइम्स स्क्वायरमा सुरू भएको ¥यालीमा हजारौं मानिसहरू सामेल भएका थिए ।
सडक र सबवेहरू ’राजतन्त्र होइन लोकतन्त्र’ र ’संविधान वैकल्पिक होइन’ लेखिएका प्लेकार्ड बोकेका मानिसहरूले भरिएका थिए । यी प्रदर्शनहरू हुनुभन्दा पहिला ट्रम्प समर्थकहरूले प्रदर्शनकारीहरू अति–वामपन्थी संगठन एन्टिफासँग सम्बन्धित रहेको आरोप लगाएका थिए ।
ट्रम्पका सहयोगीहरूले प्रदर्शनहरूलाई ’द हेट अमेरिका ¥याली’ भनेर निन्दा गरेका थिए । प्रदर्शनकारी र आयोजकहरूले शनिबार प्रदर्शन शान्तिपूर्ण रहेको बताएका छन् ।
आयोजक पक्षले आफ्नो वेबसाइटमा ’नो किंग्स’ प्रदर्शनको मूल सिद्धान्त अहिंसा रहेको बताएको छ । सबै प्रदर्शनकारीहरूलाई कुनै पनि सम्भावित द्वन्द्वलाई कम गर्न प्रयास गर्न अपील गरेको छ ।
न्यूयोर्क प्रहरी विभागका अनुसार, शहरभरि पाँच स्थानमा भएका विरोध प्रदर्शनमा एक लाख भन्दा बढी मानिसहरू सहभागी थिए । ह्वाइट हाउस फर्किएदेखि ट्रम्पले आफ्नो राष्ट्रपतिको शक्ति प्रयोग गर्दै धेरै कार्यकारी आदेशहरू जारी गरेका छन् ।
उनले कांग्रेसद्वारा अनुमोदित कोष रोकेका छन्, संघीय सरकारको कटौती स्थापना गरेका छन् र धेरै देशहरूमा व्यापक शुल्क लगाएका छन् । हालसालै, उनले गभर्नरहरूको विरोधको बाबजुद धेरै शहरहरूमा राष्ट्रिय गार्ड तैनाथ गरेका छन् ।
राष्ट्रपतिले समस्याग्रस्त देशको पुनर्निर्माणका लागि आफ्ना कार्यहरू आवश्यक रहेको बताएका छन् । ट्रम्पले तानाशाह वा फासीवादी भएको आरोपलाई ’पागल’ भनेर खारेज गरेका छन् ।
यता प्रदर्शन आयोजना गर्ने पक्षले देशभरि दुई हजार ६०० भन्दा बढी कार्यक्रम हुने अपेक्षा गरेको अलजजिराले जनाएको छ । ‘विरोध गर्नु नै ठूलो देशभक्ति हो’, ‘फाँसीवादको प्रतिरोध गर’ जस्ता नारा लेखिएका प्लेकार्ड बोकेर शनिबार धेरै स्थानमा ¥याली गरिएको थियो ।
¥यालीका कारण सडकहरू उत्सवजस्तै देखिएको थियो । ट्रम्प ह्वाइट हाउस फर्किएपछि यो तेस्रो ठूलो प्रदर्शन हो । यो प्रदर्शन हालको सरकारी ‘सटडाउन’को पृष्ठभूमिमा भइरहेको छ ।
‘सटडाउन’ले संघीय कार्यक्रम र सेवा मात्र बन्द नभएर संसद् र अदालतको संस्थागत स्वतन्त्रतामाथि खतरा बढेको चेतावनी पनि दिएको छ । प्रदर्शनकारी न्युयोर्कको टाइम्स स्क्वायर, बोस्टन कमन, शिकागोको ग्रान्ट पार्क र सयौँ साना सार्वजनिक स्थलमा जम्मा भएका थिए ।
अमेरिकाबाहिर पनि ¥याली आयोजना गरिएको थियो । लन्डनस्थित अमेरिकी दूतावासबाहिर २०० भन्दा बढी प्रदर्शनकारी भेला भए । म्याड्रिड र बार्सिलोनामा पनि सयौँले सहभागिता जनाएका थिए ।
ट्रम्प आफैँ फ्लोरिडास्थित मार–ए–लागोमा बस्दै आएका छन् । शुक्रबार फक्स न्युजसँगको अन्तर्वार्तामा उनले भने, “उनीहरूले मलाई राजा भन्दै छन्, तर म राजा होइन।”
