४ असार, काठमाण्डौ ।
विश्वकपमा कोलम्बियाले विजयी सुरूआत गरेको छ । मेक्सिको सिटी स्टेडियममा उज्बेकिस्तानविरुद्धको खेलमा कोलम्बिया ३–१ ले विजयी भएको हो । खेलको सुरुबाती समयदेखि नै आक्रामक रणनीति अपनाएको कोलम्बियाका लागि ४०औँ मिनेटमा ड्यानियल मुनोजले गोल गर्दै टोलीलाई पहिलो हाफमा १–० को अग्रता दिलाएका थिए ।
दोस्रो हाफमा रणनीतिक परिवर्तनसहित मैदान उत्रिएको उज्वेकिस्तानले खेलको ६०औँ मिनेटमा बराबरी गोल फर्कायो । उज्वेकिस्तानका भरपर्दा मिडफिल्डर अब्बोसबेक फायजुल्लाएभले उत्कृष्ट गोल गर्दै खेललाई १–१ को स्थितिमा ल्याएका थिए । उज्वेकिस्तानले बराबरी गोल गरेको ठीक ५ मिनेटपछि नै कोलम्बियाले खेलमा पुनः कमब्याक ग¥यो ।
६५औँ मिनेटमा स्टार स्ट्राइकर लुइस डियाजले सानदार गोल गर्दै कोलम्बियालाई २–१ को अग्रता दिलाए । खेलको अन्तिम क्षणमा उज्वेकिस्तानले बराबरीका लागि निकै मिहिनेत गरे पनि बलियो कोलम्बियन रक्षापंक्ति तोड्न सकेन ।
११ मिनेट थपिएको इन्जुरी समयको नवौँ मिनेटमा जेमिन्टन काम्पाजले गोल गरेपछि कोलम्बियाको ३–१ को जित सुनिश्चित भएको हो ।
खेलको अन्तिम ह्विसल बज्दासम्म उज्वेकिस्तानले थप अवसर सिर्जना गर्न सकेन । यो जितपछि कोलम्बिया ३ अंकसहित समूह के को शीर्ष स्थानमा उक्लेको हो । यसै समूहको अर्को खेलमा पोर्चुगल र डिआर कंगोले १–१ को बराबरी खेल्दै अंक बाँडेका थिए । खेलपछि क्रिस्टियानो रोनाल्डोले सामाजिक सञ्जाल फेसबुकमा पोर्चुगलको निराशाजनक सुरुवातप्रति संक्षिप्त प्रतिक्रिया दिएका छन् ।
उनले सुरुवात राम्रो नभए पनि आगामी खेलमा केन्द्रित हुने बताएका हुन् । पहिलो खेलमै प्रजातान्त्रिक गणतन्त्र कंगोसँग १–१ गोलको बराबरीमा रोकिएपछि पोर्चुगलका कप्तान क्रिष्टियानो रोनाल्डोले टोलीको बचाउ गरेका हुन् । खेललगत्तै सामाजिक सञ्जाल फेसबुकमार्फत उनले लेखेका छन्, “यो हामीले चाहेको जस्तो सुरुवात होइन, तर अझै धेरै खेलहरू बाँकी छन् । अब शिर ठाडो पारेर अर्को खेलमा केन्द्रित हुनुपर्छ ।”
छैटौँ मिनेटमै जोआओ नेभेसको गोलबाट अग्रता लिए पनि योआन विसाले कर्नरमार्फत बराबरी गोल फर्काएपछि पोर्चुगल दबाबमा आएको थियो । पोर्चुगिज मुख्य प्रशिक्षक रोबर्टो मार्टिनेजले पहिलो गोलपछि खेलको रूप फेरिएको स्वीकार गरे ।
उनले भने, “पहिलो गोलपछि हाम्रो निर्णय प्रक्रिया र भित्री तालमेलमा कमजोरी देखियो । कंगोले बराबरी गरेपछि खेल पूर्ण रूपमा बदलियो । अब हामीले गल्तीहरू सुधार्नुपर्छ ।” अब पोर्चुगलले उज्वेकिस्तान र कोलम्बियाले डीआर कंगोको सामना गर्नेछ ।
यस्तै, इंग्ल्याण्ड र क्रोएसियाबीचको खेलमा इंग्ल्याण्ड ४–२ ले विजयी भएको थियो भने घाना र पानामाबीचको खेलमा घाना १–० ले विजयी भयो । यससंगै सबै समूहको पहिलो खेल सकिएको छ । समूहचरण अन्तरगत सबै ४८ वटै टोलीले पहिलो खेल खेलेका हुन् ।
