काठमाडौं, कात्तिक ८
वर्तमान ओली सरकारका वर्तमान मन्त्रीहरुको सक्रियता र चुस्तपन नदेखिएपछि जनतामा निरासा बढिरहेको छ । दुई तिहाई बहुमतले सरकार बनाएको कम्युनिष्ट सरकारले नागरिकको सामान्य अपेक्षा पुरा गर्न नसकेपछि मन्त्री परिवर्तनको कसरत शुरु गरेको छ ।
अब बस्ने स्थायी समिति बैठकमा वर्तमान मन्त्रीहरुको कार्यशैली र मन्त्रीहरु परिवर्तन गर्नेबारे व्यापक छलफल हुने सत्तारुढ दल नेपाल कम्युनिष्ट पार्टी (नेकपा) का स्थायी समिति सदस्य एवम् सांसद देवेन्द्र पौडेलले स्पष्ट पारे ।
उनका अनुसार केपी ओलीकै नेतृत्वमा केहि मन्त्रीहरु अदल–बदल र केहि नयाँ समेत आउने सक्ने छन् । उनले भने, ‘अब बस्ने स्थायी समिति बैठकमा प्रधानमन्त्रीको टिम परिवर्तन हुन्छ । तर, प्रधानमन्त्री परिवर्तन हुँदैनन् ।’
मंगलबार रिपोर्टर्स क्लब नेपालले आयोजना गरेको साक्षात्कारमा बोल्दै नेता पौडेलले भने, ‘सरकारको काममा प्रभावकारिता भएन् । अब योभन्दा अझै प्रभावकारिता हुनुपर्छ । अब बस्ने स्थायी समिति बैठकमा जनताले हामीसँग राखेका गुनासा र टिप्पणीहरु जस्ताको त्यस्तै राख्छौं । अब दशैंलगत्तै वातावरण तात्छ । सरकारले अब आफ्ना गतिविधिहरु बढाउँछ । सरकारले अब काम थाल्नुपर्छ ।’
यद्धपी उनले मान्छे फेरेर काममा प्रभावकारिता नआउने पनि स्पष्ट पारे । पौडेलले भने,‘अनुभवी टिम आवश्यक पर्यो भने मन्त्रिमण्डल पूनर्गठन हुन्छ । तर, अहिले प्रधानमन्त्री फेरिने सम्भावना छैन । आवश्यक पर्यो भने मन्त्रीहरुको जिम्मेवारी अदलीबदली हुन्छ ।’
उनले भने ‘अहिले सरकारका बारेमा भैरहेका आलोचनाहरु मननयोग्य छन् । हामी अब समिक्षा गर्छौं । यसको मतलव यो होईन की, हिजो चकाचक थियो, यो सरकार आएपछि सबै बर्वाद भयो भन्ने अवस्था अहिले छैन् । कामहरु अब विस्तारै अघि बढ्छन् ।’
यसअघि प्रधानमन्त्री केपी शर्मा ओलीले पनि मन्त्रीहरुको कार्यशैलीप्रति असन्तुष्टि जनाउँदै काम गर्ने शैली बदल्न निर्देशन दिंदै आएका थिए ।
यस कुराले पनि मन्त्री परिवर्तनको कुरालाई बल दिएको छ । तर, कसको ठाउँमा को मन्त्री बनेर आउने छन् भन्ने कुरा भन्ने अहिलेसम्म चर्चाको विषय बनिसकेको छैन ।
