विराटनगर, कार्तिक २६
मोरङको ग्रामथान गांउपालिकामा गएको भदौ १ गते विभत्स तवरले हत्या गरिएकी विराटनगरकी शिखा घिमिरेको परिवारलाई नेपाल लाइफ इन्स्योरेन्स कम्पनीले बिमा रकम हस्तान्तरण गरेको छ ।
सो इन्सोरेन्स कम्पनीले मृतकका बाबु कृष्ण घिमिरेलाई बिमा वापतको रकम प्रदान गरेको छ ।इन्स्योरेन्सका विराटनगर शाखा प्रमुख हिरामणि भट्टराईले मृतकका बाबु घिमिरेलाई २ लाख २५ हजार ७ सय ८० रुपैयाको बिमा रकमको चेक हस्तान्तरण गरे ।
मृतक शिखाले गराएकी १ लाख ६ हजारको १५ बर्षे सावधिक जिवन बिमालेख अन्र्तगतको विमा रकम मृतकका बाबुलाई हस्तान्तरण गरिएको भट्टराईले जानकारी दिए ।
मृतकको १ लाख ६ हजारको मात्र बिमालेख भएपनि हत्यालाई समेत इन्स्योरेन्स कम्पनीहरुले दुर्घटना मृत्यु मान्ने गरेको र सो वापत दोहोरो रकम दिने नियम अनुसार शिखाका परिवारलाई बिमालेखको आर्जित बोनस समेत गरी दुईगुणा बढी रकम प्रदान गरिएको इन्स्योरेन्सले जनाएको छ ।
विराटनगर १३ निवासी २३ बर्षीयालाई स्कुटीमा ग्रामथान गांउपालिको नहर छेउमा लिएर गएका शिखाकै प्रेमीक दिनेश भट्टराईले धारिलो हतियार प्रहारगरी हत्या गरेका थिए ।
