विराटनगर ,मंसिर १२
मोरङको झापा बैजनाथपुरस्थित प्रस्तावित रंगशाला निर्माणको काम लथालिंग बनेको छ । प्रदेश नं. १कै अत्यधुनिक र सुविधासम्पन्न रंगशालाका रुपमा यसलाई हेरिएको थियो । राष्ट्रिय खेलकुद परिषद र खेल पदाधिकारीबीचको अन्तर कलहका कारण बजेट अभावमा रंगशाला निर्माणको काम अलपत्र परेको छ ।
रंगशालाको लागि दुई दशकअघि नै जग्गा खरिद गरिए पनि पर्याप्त बजेट र समन्वयको अभावमा निर्माणको काम रोकिएको हो । प्रस्तावित रंगशालामा संरचना निर्माणको काम अलपत्र परेपछि स्थानीयले गौचरणको रुपमा प्रयोग गर्न थालेका छन् । राष्ट्रिय खेलकुद परिषदले २०५५ सालमा ८५ लाख लागतमा १५ विगाहा १५ धुर जग्गा रंगशालाका लागि खरिद गरेको थियो ।
सातौं राष्ट्रिय खेलकुद प्रतियोगितामा अस्थाई संरचना बनाएर क्रिकेट, सुटिङ लगायतका केही खेलहरु सोही मैदानमा गराइयो । तर, त्यसयता यहाँ कुनै प्रतियोगिता आयोजना भएको छैन । सातौं राष्ट्रिय खेलकुद प्रतियोगिताका क्रममा भएको खर्चसमेत जोड्दा हालसम्म लगभग ७ करोड बजेट खर्च भईसकेको छ । तर स्थानियले भने खर्चको विषयमा आशंका गरेका छन् ।
विराटनगर पुष्पलालचौक निवासी सन्तोष दाहालले काम गरेजस्तो मात्र गरेको बताए । उनले सरकारद्धारा छुट्याईएको बजेट सदुपयोग नभएको बताए । उनले भने‘ संरचना हेर्दा आँखामा छारो हालेजस्तो देखिन्छ । यहाँ एउटा पोल गाडेर छोडेको छ, मैदान पनि नसम्याएको देखिन्छ ।’
पछिल्लो समय राष्ट्रिय खेलकुद परिषदले नै बैजनाथपुरको प्रस्तावित रंगशालालाई प्राथमिकतामा राख्न छाडेको छ । परिषदको उदासिनताले गर्दा नै रंगशालाको लागि आवश्यक बजेट विनियोजन हुन नसकेको कारण यसको निर्माणले पुर्णता पाउन नसकेको पुर्वाञ्चल क्षेत्रिय खेलकुद समितिका अध्यक्ष रविन नगरकोटीले बताए ।
दुई दशकको अवधिमा सो रंगशालामा क्रिकेट खेल्न जालीले घेरेर कामचलाउ मैदान बनाइएको छ । त्यसबाहेक अरु कुनै संरचना बन्न सकेका छैनन् । राष्ट्रिय खेलकुद परिषदले प्रस्तावित रंगशालालाई महत्व नदिइएको यहाँका खेलप्रेमीका भनाई छ। रंगशाला निर्माणका लागि सरकारले ५० लाख मात्रै छुट्याएको छ ।
रंगशाला निर्माणको गुरु योजना अनुसार अहिले काम गर्ने भन्दापनि मनलाग्दी रुपमा काम हुदाँ समस्या भएको खेलकुद पदाधिकार्ीहरु नै बताउछँन । पूर्वाञ्चल क्षेत्रीय खेलकुद विकास समितिको कार्यालयका प्रमुख टेकप्रसाद कट्टेलले जग्गा खरिद गर्दा प्रस्तावित डिजाइन नै परिवर्तन गरिएको बताए ।
उनले भने ‘जहाँ फुटबल ग्राउण्ड बनाउने भनिएको छ, त्यहाँ क्रिकेट मैदान बनेको छ । जहाँ क्रिकेट मैदान बनाउने भनिएको छ, त्यहाँ फुटबल ग्राउण्ड बनेको छ ।’
उनले गुरुयोजना एकतरिकाले बनाईएको र राजनितीक परीवर्तन हुँदै जाँदा जसलाई जे मनलाग्यो त्यही अनुसार काम गर्दै गएको बताए । तत्कालीन समयमा विराटनगरस्थित शहिद रंगशालालाई अभ्यास गर्ने मैदानका रुपमा मात्रै प्रयोग गर्ने हिसाबले बैजनाथपुरको रंगशालाको गुरु योजनाअघि बढाइएको थियो ।
गुरुयोजना अनुसार रंगशाला गर्न अरबौं बजेट चाहिने भए पनि सरकारले वाषिक केही लाखका दरले मात्रै निकासा गरिरहेको खेलकुदका पदाधिकारीको भनाइ छ । विराटनगरमा भएको सहिद रंगशाला साँघुरो भइसकेको छ । अन्य खेलकुदका संरचना पर्याप्त छैन । निर्माण गर्ने स्थानको पनि अभाव छ । त्यसर्थ खेलकसदको विकासका लागि वैजनाथपुर रंगशालालाई पूर्णता दिनुबाहेको विकल्प देखिदैन ।
