काठमाडौँ,पुस १७
‘नेपाली टोपी, हाम्रो गौरब, हाम्रो पहिचान’ भन्ने नाराका साथ जागरुक युवा अभियान नेपालले छैटौं नेपाली टोपी दिवस भव्यरुपमा मनाएको छ ।
अंग्रेजी नयाँ वर्षको दिन मंगलवार काठमाडौको माइतीघर मण्डलामा भेला भएर युवायुवतीले गत वर्षजस्तै ‘टोपी दिवस’ मनाएका हुन् । माइतीघरमण्डलमा भेला भएको युवायुवतीले पञ्चेबाजासहित मण्डलादेखि नयाँबानेश्वरसम्म प्रभातफेरि गरेका थिए ।
अंग्रेजी नयाँ वर्ष मनाउने प्रचलन बढिरहेको भन्दै अभियानले २०७० सालदेखि नेपाली मौलिक पोशाक संरक्षणको अभियानका लागि ‘टोपी दिवस’ मनाउन शुरु गरेका हुन् ।
सदियौंदेखि नेपाली पहिचानको रुपमा रहेको दौरा सुरुवाल, टोपी र गुन्यूचोलोलाई तत्कालीन सरकारले राष्ट्रिय पोशाकको सूचीबाट हटाएपछि अभियानले नेपाली टोपी (ढाका टोपी, भाद्गाउँले टोपी)लाई राष्ट्रिय पहिचानका रुपमा घोषणा गरियोस् भन्ने मागसहित नेपाली टोपी दिवस मनाउँदै आएको छ ।
राष्ट्रिय टोपी दिवसको अवसरमा मंगलवार ‘पुर्खाको रगत र पसिनाले जोगाएको मेरो देश नेपाली टोपीले आफ्नै पहिचान बनाएको मेरो देश’ लेखेको ब्यानर र टोपी लगाएका दाङको घोराहीस्थित पद्मोदय पब्लिक नमुना उच्च माध्यमिक विद्यालयका विद्यार्थीहरु ।
राष्ट्रिय पोशाक दौरा सुरुवाल र ढाका टोपीमा सजिएका सहभागीले ढाका टोपीलाई पहिचान दिन माग गर्दै राष्ट्रिय पोसाकको संरक्षण गर्नुपर्नेमा जोड दिएका थिए ।
