विराटनगर, पुस १६
राष्ट्रसेवक बहुमुखी सहकारी संस्था लिमिटेडको १९ औं बार्षिक साधारणसभा सम्पन्न भएको छ । विराटनगरस्थित अतिथि सदनको सभाहलमा विविध कार्यक्रम आयोजना गर्दैसहकारीको साधारणसभा सम्पन्न भएको हो ।
सो अवसरमा संचालक समितिको तर्फबाट बार्षिक प्रतिवेदन प्रस्तुत गर्नुहुंदै सहकारीका अध्यक्ष जिवन काफ्लेले निजामति कर्मचारी संगठनको अभिभावकत्वमा मोरङबाट शुरु भएको सहकारी अभियानमार्फत मुलुकको ६८ जिल्लामा राष्ट्रसेवक सहकारी संस्था लिमिटेडहरुको स्थापना भइसकेको जानकारी दिए ।
उनले हाल ती सहकारीहरुमा २५ हजार सदस्य रहेको र १ अर्ब ५० करोड बढी पुँजी निर्माण र परिचालन गर्न सक्षम भएको जानकारी दिए । कार्यक्रममा मोरङका प्रमुख जिल्ला अधिकारी रामप्रसाद आचार्य र नेपाल निजामति कर्मचारी संगठनका केन्द्रीय अध्यक्ष केदारप्रसाद देवकोटा लगायतले शुभकामना ब्यक्त गरेका थिए ।
