काठमाडौं, माघ १६
बाली तथा पशुपन्छी बीमामा आकर्षण बढ्दै गएको छ । बीमा समितिले दिएको जानकारी अनुसार बाली तथा पशुपन्छी बीमा गर्नेको संख्या बढ्दै गएको छ । उक्त बीमाकै लागि सरकारले ७५ प्रतिशत अनुदानको समेत व्यवस्था गरेको छ । चालु आर्थिक बर्षको ६ महिनामा ५ अर्ब ९५ करोड ५८ लाख ६० हजार ८ सय २५ रुपैयाँ बीमाङ्क संकलन भएको बीमा समितिले जनाएको छ । यस्तै, सोही अवधीमा बीमा शुल्क भने २७ करोड ६० लाख ७ सय ४६ रुपैयाँ संकलन भएको छ । साथै, बीमा लेख संख्या ३५ हजार ५ सय ५५ पुगेको छ ।
चालु आर्थिक बर्षको पहिलो त्रैमासमा मात्रै बाली तथा पशुपन्छी बीमांक ४ अर्ब ६८ करोड ३० लाख ३९ हजार ६ सय १० रुपैयाँ संकलन भएको थियो । दौश्रो त्रैमास अर्थात पुस मसान्तसम्ममा ५ अर्ब ९५ करोड ५८ लाख ६० हजार ८ सय २५ रुपैयाँ संकलन भएको छ ।
चालु आर्थिक वर्षको पहिलो त्रैमासमा २१ करोड ७५ लाख ५० हजार ६ सय ९७ रुपैयाँ बीमा शुल्क संकलन भएको थियो भने दोश्रो त्रैमास पुस मसान्त सम्ममा २७ करोड ६० लाख ७ सय ४६ रुपैयाँ संकलन भएको बीमा समितिले उपलब्ध गराएको तथ्याङ्मा उल्लेछ छ । साथै, पहिलो त्रैमासमा बीमालेख संख्या २७ हजार ८ सय १४ रहेको थियो भने दोस्रो त्रैमाससम्म आइपुग्दा वृद्धि भएर ३५ हजार ५ सय ५५ पुगेको छ ।
बाली तथा पशुपन्छि बीमामा किन आकर्षण बढ्यो त ? बीमा समितिका अध्यक्ष चिरञ्जिवी चापागाईँ भन्छन्–‘पछिल्लो समय देशैभर बीमाका कार्यक्रम सञ्चालन भए, त्यसको फलस्वरुप बीमाको आधारभूत ज्ञान पाउनेहरुले बीमामा सहभागी हुन रुचाए । त्यसैले यसको सकारात्मक असर कृषी बीमामा समेत पर्न गयो, पशु तथा बाली धन बीमाको प्रिमियम ४२ प्रतिशतले बढेको छ ।’ अध्यक्ष चापागाईँले बीमामा विश्वास रहेको र बीमाप्रति सकारात्मक धारणा फैलदै गएको तर्क गरे ।
चालु आर्थिक बर्षको सुरुवातमा बीमा समितिले लघु बीमा निर्दे्शिका जारी गरेको थियो । यसरी निर्दे्शिका जारी गरेपश्चात बीमाका कार्यक्रममा सहभागिता बढ्दै गएको समितिको बुझाई रहेको छ । (विकास न्युजबाट)
