धनकुटा, पुस २०
प्रदेश नम्वर एकको राजधानी धनकुटा हुनुपर्ने माग राख्दै गरिएको अनिश्चितकालीन आम हड्तालका कारण आज दोस्रो दिन पनि सदरमुकाम धनकुटा लगायत बजारहरुको जनजीवन प्रभावित भएको छ ।
तेह्रथुम, संखुवासभा र भोजपुर जाने र आउँने ढुवानी र यातायात सेवा ठप्प छन् । हिले र सदरमुकाम धनकुटा बजारका उद्योगधन्दा, कलकारखाना, होटल र पसल बन्द गराइएको छ ।
आन्दोलनकारीहरुले बिहानैबाट कोशी राजमार्गको धनकुटाखण्ड अबरुद्ध पारेका छन् । जसका कारण धनकुटा तेह्रथुम, संखुवासभा र भोजपुरको ढुवानी र यातायातसेवा ठप्प छ । आन्दोलनकारीहरुले धनकुटाका बजार–पसल बन्द गराएका छन् । उनीले मोटरसाइकलसमेत चल्न दिएका छैनन् ।
विद्यालयहरुमा परीक्षा चलिरहेकाले विद्यार्थी बोकेका, तरकारी, दूध आकस्मिक सेवा र समाचार संकलनमा खटिएका पत्रकारका सवारीसाधन भने निर्वाधरुपमा चलिरहेका छन् ।