सिराह, चैत ४
भर्खरैमात्र सरकारसँग ११ बुँदे सहमति गरेर मूलधारको राजनीतिमा आएका डा. चन्द्रकान्त (सीके) राउतले ‘जनमत पार्टी’ नामका नयाँ राजनीतिक संगठन खोलेका छन् । राउत नेतृत्वको स्वतन्त्र मधेश गठबन्धनको सिरहा जिल्लाको लहानमा चैत ३(४ गते बसेको राष्ट्रिय परिषद्को बैठक (केन्द्रीय भेला)ले पार्टी खोल्ने निर्णय गरेको हो ।
राउतले नेपालको संविधान भित्र रहेर पार्टी स्थापना गरी अगाडि बढने निर्णय गराएका हुन् । केन्द्रीय भेलाले डा. सिके राउत राष्ट्रिय अध्यक्ष रहेको ३५ सदस्यीय केन्द्रिय कार्यकारिणी समिति चयन गरेको छ।
यस्तै केन्द्रिय सदस्यहरुमा कैलाश महतो (महोत्तरी), राज कुमार यादव (सिरहा), अब्दुल खान (बर्दिया), चन्दन सिंह (महोत्तरी), बबिता ईसर (सप्तरी), कौशिला महतो (झापा), परमेश्वर मुर्मु (मोरंग), सीताराम पंडित (सुन्सरी), सुरेन्द्र शर्मा (सप्तरी), सतिला यादव (सिरहा), इन्द्रजीत यादव (धनुषा), संजय यादव (महोत्तरी), नरेश कुशवाहा (सर्लाही), वीरेन्द्र साह (रौतहट), दिनेश यादव (बारा), संजय साह (पर्सा), ध्रुव गौड (नवलपरासी), भोपेन्द्र यादव (रुपन्देही), हकिकुल्ला खान (कपिलवस्तु), राधा यादव (दाङ), इरफान अहमद शेष (बाँके), महेन्द्र प्रसाद चौधरी (कैलाली), दुर्गा चौहान (नवलपरासी) र आशा मेहता (सुन्सरी) रहेका छन्।
“जनमत पार्टी” को गठनसँगै जनमत जुटाउन जनतासमक्ष जाने र जनमतबाटै संवैधानिक रुपमा नै जनताको समस्या, माग, हकहित र अधिकारको लागि अनवरत समर्पित र निस्स्वार्थ भावले संघर्षरत रहने प्रतिबद्धता भेलाले जाहेर गरेको सो पार्टीका केन्द्रिय सदस्यअब्दुल खानद्वारा जारी विज्ञप्तिमा उल्लेख गरिएको छ ।
उक्त पार्टीले रातो, सेतो र हरियो रंगको ठाड़ो धर्का (स्ट्रीप) बीचमा बीचको सेतो स्ट्रीपमा रातो रंगको अष्टदल भएको झन्डा राख्ने र चुनावचिन्हमा “अष्टदल” लाई राख्ने गरी निर्वाचन आयोगमा निवेदन दिने निर्णय गरेको छ।
भेलाले स्वतन्त्र मधेश गठबन्धन र नेपाल सरकारको बीचमा भएको ११(बूँदे सहमतिलाई कार्यान्वयनमा ल्याउँदै स्वतन्त्र मधेश गठबन्धनका समर्थकहरुमाथि लगाइएका मुद्दाहरु अविलम्ब फिर्ता लिनका लागि छिटो पहल गर्ने निर्णय गरेको छ । यसका लागि चन्दन सिंहको संयोजकत्वमा ३(सदस्यीय सहमति कार्यान्वयन समिति बनाइएको छ।
यस्तै, प्रहरी हिरासतमा मारिएका बाँके जिल्ला संयोजक राम मनोहर यादवको परिवारलाई सरकारसँगको सहमति अनुसार क्षतिपूर्ति तथा परिवारका एक जनालाई रोजगारी उपलब्ध गराउने पहल अविलम्ब थाल्न पनि सोही समितिलाई जिम्मेबारी दिइएको जनाइएको छ ।
