विराटनगर, चैत १८
प्रदेश सरकारले मोरङको पथरीशनिश्चरेमा निर्माण गर्न लागेको सांस्कृतिक ग्रामको अवधारणा तयार भएको छ । सांस्कृतिक ग्राम निर्माणको अवधारणा तयार गर्न गठन गरिएको अध्ययन कार्यदलले मंगलबार प्रदेश १ का सामाजिक विकास मन्त्री जिवन घिमिरेसमक्ष अवधारणाको प्रतिवेदन बुझाएको हो ।
अध्ययन समितिका संयोजक चण्डीप्रसाद राईले मन्त्री घिमिरेलाई प्रतिवेदन बुझाएका हुन् । प्रतिबेदन बुझ्दै मन्त्री घिमिरेले सांस्कृतिक ग्राम निर्माण सुरु गर्न बाटो खुलेको बताए ।
मोरङको पथरी शनिश्चरे नगरपालिका –१० स्थित भुटानी शरणार्र्थी शिविरमा उनीहरुको पुर्नबासपछि खाली भएको सय बिघा क्षेत्रफलमा पर्यटन प्रर्वद्धनका लागि सांस्कृतिक ग्राम निर्माण गर्ने तयारी गरेको प्रदेश सरकारले गत पुस २३ मा १७ सदस्यीय कार्यदल गठन गरेको थियो ।
कार्यदलले डिपीआर तयार गर्दा ध्यान दिनुपर्ने पक्षहरुको सिफारिस गर्ने, सांस्कृतिक ग्राम राख्न उपयुक्त हुने वस्तु तथा सामाग्रीको सची तयार गर्ने, संरचना र कार्यविवरण तयार गर्ने, आवश्यक जनशक्ति र पुर्वाधारको प्रक्षेपण गर्ने तथा विभिन्न स्थानहरु झल्किने ब्लकहरु के कस्ता र कसरी बनाउन उपयुक्त हुन्छ भन्ने कुराहरुको अध्ययन गरेर प्रतिवेदन तयार गरेको हो ।
सामाजिक विकास मन्त्रालयले सांस्कृतिक ग्राम निर्माणको लािग पहिलो चरणमा ५० लाख रुपैँया बजेट विनियोजन समेत गरेको थियो । सांस्कृतिक ग्राममा सय विघा जग्गालाई सबैक्षेत्रको जनजीवन झल्काउने गरी हिमाली प्लट,पहाडी प्लट, तराई प्लट तथा हिमशृङ्खला, नदी प्रवाह र वनजंगल समेत देखिनेगरी विविध प्राकृतिक सम्पदाको प्लटमा विभाजन गरी निर्माण गरिने छ भने अर्को प्लटमा तीन धाम निर्माण गरिने छ । तीनधाममा खोटाङको हलेसी महादेवस्थान, सुनसरीको बराहक्षेत्र र ताप्लेजुङको पाथिभरादेवीको हुबहु चित्रण गरिने सामाजिक विकास मन्त्रालयले जनाएको छ ।
