इलाम, माघ ३
प्रदेश नं १ का प्रहरी अतिरिक्त महानिरीक्षक पशुपति उपाध्यायले प्रहरी कार्यालय पुनःनिर्माण गरिएपछि इलाका र प्रहरी चौकीले प्रदान गर्ने सेवामा आत्मबलसमेत थपिएको महसुश भएको बताएका छन् ।
नेपाल–भारत सीमाको पशुपतिनगरमा पुनःनिर्माण गरिएको इलाका भवन उद्घाटन गर्दै उनले भने, “अब कार्य क्षमतामा पनि सुधारको महसुश हुनेछ ।”
उनले प्रहरीमा पनि प्रविधिअनुसार अनुसन्धानको विधि परिवर्तन हुँदै गएकाले नागरिकमा परिवर्तनको महसुश हुने धारणा राखे ।
उपाध्यायले अपराधको स्वरुप बदलिएको भन्दै प्रहरीले पनि अनुसन्धानको दायरा फराकिलो पारेको बताए । उनले अपराधको गहिराइमा पुगेर मात्र अपराधीको पहिचान गर्नाका साथै सामाजिक दबाबको भरमा अनुसन्धानलाई कसैप्रति केन्द्रित गर्न नहुने समेत बताए ।
संघीय इकाई प्रहरी कार्यालय, चन्द्रगढी, झापाका प्रहरी प्रमुख वरिष्ठ प्रहरी उपरीक्षक पिताम्बर अधिकारीले कर्तव्यपालनका क्रममा सबै तहले अग्रसरता लिनुपर्ने बताए । प्रहरीको संरचनाले जनतालाई राहतको आभाष भएको निर्माण समितिका अध्यक्ष सवित्री सिवाको धारणा छ ।
२०६० साल चैत २५ गते क्षतिग्रस्त भएको पशुपतिनगरको भवन निर्माणका लागि शान्ति तथा पुनःनिर्माण मन्त्रालय शान्तिकोष सचिवालयबाट एक करोड ६४ लाख ३१ हजार ८४० प्राप्त भएकामा रु एक करोड ४३ लाख ४० हजार ८१९ मा इलाका भवन निर्माण सम्पन्न गरिएको प्रहरी नायब उपरीक्षक ईश्वर थापाले जानकारी दिए ।
भवनको भुइँतलामा सुविधायुक्त पुरुष तथा महिला हिरासत कक्ष, गार्ड कक्ष, प्रशासनिक कक्ष, कार्यालय प्रमुख, अपराध अनुसन्धान कक्ष, महिला तथा बालबालिका सेवा केन्द्र, बैठक कक्ष, सञ्चार कक्षलगायत १४ वटा कोठा रहेको उनले बताए ।
रासस
