विराटनगर, चैत २६
साहित्यकार तथा समालोचक प्रा. डा. गोविन्दराज भट्टराई र महेश गुरूकुल आश्रम देवघाटका प्राचार्य प्रा. डा. गुरूप्रसाद सुवेदीलाई ‘वाङ्मय पुरस्कार’बाट सम्मानित गरिएको छ । पण्डित काशीनाथ उपाध्याय–हरिप्रिया कट्टेल वाङ्मय प्रतिष्ठानको नवौँ वार्षिक उत्सवको अवसरमा सोमबार विराटनगरमा आयोजित कार्यक्रममा उनीहरुलाई २११११।– रुपैयाँ राशीको सो पुरस्कार प्रदान गरिएको हो ।
त्यस्तै साङ्गवेद माध्यामिक विद्यालय चारपाने झापालाई रु.१५१११।– रुपैयाँ राशिको ‘पं.कमलापति उपाध्याय–डम्बरकुमारी कट्टेल वाङ्मय पुरस्कार’ बाट र कवयित्री मेनुका चापागाईंलाई १११११।– रुपैयाँ राशिको ‘हरिप्रिया कट्टेल प्रतिभा पुरस्कार’ प्रदान गरिएको छ । त्यस्तै पिण्डेश्वर विद्यापीठका छात्रद्वयलाई २५००।– रुपैयाँ राशिको ‘प्रतिभा पुरस्कार’ले पुरस्कृत गरिएको छ ।
पुरस्कृत व्यक्तित्वलाई प्रदेश नम्बर १ का प्रदेश प्रमुख प्रा. डा. गोविन्दबहादुर तुम्बाहाङले पुरस्कार सहित दोसल्ला र सम्मानपत्रले सम्मान गरे । दुई चरणमा भएको कार्यक्रमको दोस्रो चरणमा सह प्राध्यापक गङ्गाधर कट्टेलद्वारा लिखित ‘आमा’ खण्डकाव्यको प्रमुख अतिथी तथा अतिथी वर्गबाट लोकार्पण गरिएको थियो ।
कृतिको परिचर्चा गर्दै प्रा. डा. गोपाल भण्डारीले कट्टेलले आफ्नी दिवङ्गत आमाको सम्झनामा रचित उक्त कृतिमा करुण र शान्त रसको प्रयोग गर्दै आफ्ना भावानुभूति सफल रुपमा उतार्न सकेको बताए । कार्यक्रमका प्रमुख अतिथि प्रदेश प्रमुख तुम्बाहाङले स्रष्टाहरुलाई सम्मान गर्ने कार्यलाई निरन्तरता दिन शुभकामना दिए ।
प्राज्ञ दधिराज सुवेदीले सम्मानित व्यक्तित्वहरु आ–आफ्नो विधा र क्षेत्रका सगरमाथा जस्तै उच्च र सबैका गुरु रहेको कुरा ब्यक्त गरे । कार्यक्रममा विभिन्न ब्यक्तिहरुले आफ्नो भनाई राखेका थिए ।
प्रतिष्ठानका अध्यक्ष प्रा. नारायणप्रसाद शर्मा कट्टेलको सभापतित्वमा सञ्चालित कार्यक्रममा विराटनगर, धरान, इटहरी, झापा लगायतका क्षेत्रहरुका विशिष्ट विद्वान्, प्राज्ञिक वर्ग, साहित्यकारहरुको ठूलो उपस्थिति रहेको थियो ।
