बिराटनगर बैशाख, ८
प्रदेश १ का सभा सदस्यहरुले झापाको बिर्तामोडस्थित प्रहरीको हिरासतमा मृत्यु भएका भनिएका १६ बर्षिय किशोरको मृत्युको घटना प्रकरण शंकास्पद रहेकाले प्रदेश सरकारसंग छानविनको माग गरेका छन् ।
प्रदेश सभा सदस्य जसमाया गजमेरले इलाका प्रहरी कार्यालय अनारमनीको हिरासतमा रहेका १६ बर्षीय किरण कार्की डोलीको प्रहरी हिरासतमा नै प्रहरीको यातनाबाट मृत्यु भएको आफन्तले दाबी गरिरहेकाले मृत्यु प्रकरणकको कारण बुझेर सत्य तथ्य बाहिर ल्याउन प्रदेश सरकारसँग माग गरेकी हुन् ।
प्रदेश सभाको आइतबार बसेको बैठकको शुन्य समयमा बोल्दै सभा सदस्य गजमेरले चोरीको आरोपमा प्रहरीले उनलाई हिरासतमा राखेकै अबस्थामा उनको मृत्यु भएकाले घटना शंकास्पद रहेकाले प्रदेश सरकारले घटनाको छानविनकालागि उच्च स्तरीय छानविन टोली गठन गर्नुपर्ने बताइन् ।
प्रदेशसभाको आइतबार बसेको बैठकमा विपद् व्यवस्थापन ऐन २०७५ संशोधन गर्ने सम्बन्धमा बनेको बिधेयक प्रस्ताव स्वरुप प्रदेशसभामा प्रस्तुत भएको छ ।
आन्तरिक मामिला तथा कानुनमन्त्री हिक्मत कार्कीले विधेयक संशोधनका लागि प्रदेश सभामा प्रस्तुत गरेका छन । मन्त्री कार्कीले प्रदेशसभा बैठकमा प्रस्तुत विधेयक एक बर्ष अघि हतार हतारमा ल्याइएकाले यसलाई संशोधन गर्न लागिएको बताएका थिए ।
उनले विधेयकको दफा २ को च र ५ मा रहेको प्रदेश विपत समितिको ठाँउमा संशोधन गरी परिषद राख्न लागिएको जानकारी दिए । त्यसैगरी यस अघि विपत व्यवस्थापनको भुमिकामा प्रदेश प्रहरीलाई मात्र ऐनमा समावेश गरिएकोमा अव सशस्त्र प्रहरी र नेपाली सेनालाईपनि विपत व्यवस्थापन भूमिकामा ऐनमा नै समावेश गरिन लागेको जानकारी दिए ।
