जेष्ठ २२, विराटनगर । मुस्लिम समुदायले आज इद उल फित्र पर्व मनाउँदै छन् ।
आज नेपाली जामे मस्जिदहरुमा विशेष नमाज पाठ गरि ठूलाबडाकहाँ आशीर्वाद लिने क्रम शुरु हुने गर्दछ । सो पर्वको अर्को उल्लेखनीय पक्ष गरीबलाई दान दिनु हो । विराटनगरसहित देशभरका मस्जिद र इदगाहमा आज विशेष कार्यक्रमका साथ नमाज पाठ गरिदैंछ । यस पर्वमा इस्लाम धर्मावलम्बीले एक वर्ष्भित्रको बचतको साढे दुई प्रतिशत नगद वा जिन्सी दान गर्नुपर्ने विधान धर्मग्रन्थ ‘कुरान’मा उल्लेख छ । यसरी दान गरिएको नगद वा जिन्सी गरिबलाई बाँडिन्छ । जसलाई जकात भनिन्छ ।
इद उल फित्रमा प्रत्येक व्यक्तिले आफ्नो गच्छेअनुसार गहुँ वा सो बराबरको नगद दान गर्छन् जसलाई सत्कार फितर भनिन्छ । सो दान आमाको पेटमा आएको बच्चाको पनि गरिनुपर्छ भन्ने नियम छ । सोे दान पनि गरीबलाई नै दिइन्छ ।
यसैबीच सरकारले मुस्लिम धर्मावलम्बीको पर्व इद उल फित्रका अवसरमा आज सार्वजनिक बिदा दिएको छ । मन्त्रिपरिषद्को जेठ १० गते बसेको बैठकले यस पर्वका दिन बिदा दिने निर्णय गरेको थियो ।
