२५ असार, विराटनगर ।
प्रदेश एकका विभिन्न जिल्लाका अपाङ्गता भएका २५ जनालाई ह्वीलचेयर र ट्राइसाईकल वितरण गरिएको छ ।
राष्ट्रिय अपाङ महासंघ नेपाल प्रदेश–१ को अग्रसरतामा प्रदेश एकको गाइघाट,बराहक्षेत्र,लेटाङ इटहरी र विराटनगर समेतका गरेर २५ जनालाई ह्वीलचेयर र ट्राइसाईकल वितरण गरिएको महासंघ प्रदेश एकका अध्यक्ष पार्वता श्रेष्ठले जानकारी दिइन् । काठमाण्डौस्थित राष्ट्रिय अपाङ पुर्नस्थापना समाजले उपलब्ध गराएको २० थान ह्वील चेयर र ५ थान ट्राइसाईकल वितरण गरिएको उनले जानकारी दिइन् । समाजले १० लाख मुल्य पर्ने ती सामाग्री निशुल्क उपलब्ध गराएको उनले बताइन् ।
विराटनगर महानगरपालिकाका प्रमुख भीम पराजुली सामाजिक विकास मन्त्रालयका सचिव हरीप्रसाद दाहाल,राष्ट्रिय अपाङ महासंघ प्रदेश एकका निवर्तमान अध्यक्ष रामबहादुर कार्की र दाता संस्थाका अध्यक्ष राकेश हमाल लगायतले अपाङता भएका ब्यक्तिहरुलाई ती सामागी्र हस्तान्तरण गरे । सो अवसरमा बोल्दै विराटनगर महानगरपालिकाका प्रमुख भीम पराजुलीले महानगरले समेत अपाङ्गता भएका ब्यक्तिहरुको हितमा विभिन्न कार्यक्रम गर्दै आएको बताए ।
सामाजिक विकास मन्त्रालयका सचिव दाहालले अपाङ्गता भएका ब्यक्तिहरुले सपाङ्ग जस्तै काम गर्नसक्ने विचार ब्यक्त गरे । सामाजिक विकास मन्त्रालयले विभिन्न शिर्षकमा बजेट विनियोजन गरेर अपाङता भएकाहरुको क्षेत्रमा काम गर्दै आएको उनको भनाई थियो ।
यसैबीच प्रदेश एकका ९ जिल्ला २२ जनालाई ह्वील चेयरको नापतौल,जडान,प्रयोग र सामान्य मर्मत सम्बन्धि प्रशिक्षण समेत दिइएको छ । प्रदेश एकमा सो बिषयको प्राविधिकको अभाव रहेका कारण राष्ट्रिय अपाङ्ग पुर्नस्थापना समाज समाजको प्राबिधिक सहयोग र सामाजिक विकास मन्त्रालयको आर्थिक सहयोगमा अपाङ्गताको क्षेत्रमा कामगर्दै आएका ९ जिल्लाका २२ जनालाई प्राविधिक तालिम दिइएको महासंघ प्रदेश–१ का कार्यक्रम अधिकृत विमल बस्नेतले जानकारी दिए ।
