२९ असार, विराटनगर ।
प्रदेश १ मा बाढी र डुवानमा परेर मृत्यु हुनेको परिवारलाई प्रदेश १ सरकारले तत्काल १ लाख रुपैयाँ दिने भएको छ । प्रदेश सरकारले नियमित विपद कोषमार्फत तत्काललाई राहतस्वरुप १ लाख रुपैया दिन लागेको प्रदेश १ का आन्तरिक मामिला तथा कानून मन्त्री एव सरकारका प्रवक्ता हिक्मत कार्कीले जानकारी दिए ।
त्यस्तै प्रदेश सरकारले बाढी र डुवानमा घाइते भएकाहरुको निःशुल्क उपचार गरिदिने भएको छ । प्रदेश १ मा बाढी र डुबानका कारण जनधनको धेरै क्षति भएपछि प्रदेश मन्त्रिपरिषदको आइतबार अपरान्ह बैठक बोलाएको छ । बैठकले थप निर्णय गर्ने जनाईएको छ ।
मन्त्री कार्कीले अमेरिका भ्रमणमा रहेका मुख्यमन्त्री शेरधन राई स्वदेश फर्किसकेका र आइतबार विराटनगर आएलगत्तै आकस्मिक बैठक डाकिएको बताए ।मन्त्री कार्कीले भने, ‘विपदमा क्षतिको अवस्था र राहतका बिषयमा मन्त्रिपरिषद बैठकले थप निर्णय लिनेछ।’
नेपाल प्रहरी, नेपाली सेना र सशस्त्र प्रहरीलाई बाढी र डुबानमा परेका मानिसको खोज तथा उद्धारमा परिचालन गरिएको पनि उनले बताए । प्रदेश प्रहरी कार्यालयका अनुसार प्रदेश १ मा बाढी र डुबानका कारण १४ जनाको मृत्यु भएको छ भने सात जना बेपत्ता भएका छन् । बाढी र डुवानका कारण प्रदेश १ मा ४ हजार बढी बिस्थापित भएका छन् ।
