८ साउन, विराटनगर ।
विराटनगर महानगरपालिकालाई फ्रि वाईफाई जोन बनाउने कार्य सुरु भएको छ । बुधबार विराटनगर महानगरपालिकामा मेयर भीम पराजुलीले विराटनगर ४ कन्चनबारी चोक स्थित शिव मन्दिरमा वाईफाईको राउटर अन गरेर सो कार्यको प्रारम्भ गरेका हुन् ।
विराटनगरका मुख्य मुख्य चोक तथा सार्वजनिक स्थलहरुमा वाईफाई राख्ने महानगरपालिकाको घोषणापत्र अनुरुप फ्रि वाईफाई जोन प्रारम्भ गरिएको मेयर पराजुलीले बताए । यसका लागि महानगरपालिका र वल्र्डलिङ्क कम्युनिकेशन प्रा.लिबीच पाँच वर्षे सम्झौता भएको छ । सम्झौता अनुरुप वल्र्डलिङ्कले पाँच वर्षमा विराटनगरका सम्पूर्ण चोकहरुमा वाईफाई जोडिसक्नुपर्ने छ ।
उद्घाटन पछि बोल्दै विराटनगर महानगरपालिकाका मेयर भीम पराजुलीले वाईफाई जोनले युवाहरुलाई महानगरसँग जोड्ने बताउँदै यसबाट कोहीपनि कुनैपनि ठाउँमा सन्चारबाट बन्चित नहुने बताए । त्यस्तै वल्र्डलिङ्क कम्युनिकेशन प्रा.लि विराटनगरका शाखा प्रबन्धक प्रेमप्रसाद घिमिरेले महानगरसँगको सम्झौताअनुरुप चोकहरुमा जतिसक्दो चाँडो वाईफाई जोडिने बताए ।
यस महिनामा ३२ ठाउँमा वाईफाई जडान गरिने लक्ष्य राखिएको छ भने बुधबारै कोशी अञ्चल अस्पताल, जिल्ला प्रहरी कार्यालय, मालपोत, भृकुटी चोक लगायत १४ ठाउँमा जडान गरिसकिएको छ । वाईफाई जडान पछि सार्वजनिक स्थलको ५० मिटर परसम्म ३ एमबीपीसको स्पीडमा वाईफाई चलाउन सकिने वल्र्डलिङ्कले जनाएको छ । वाईफाई विराटनगरभरी जुनसुकै ठाउँमा कनेक्ट गरिएपनि दिनमा डेढ घण्टा निशुल्क चलाउन सकिने छ ।
