विराटनगर, माघ २१
भोलिका लागि आह्वान गरिएको प्रदेशसभाको पहिलो बैठकमा १ स्वतन्त्रसहित ७ जना सांसदले सम्बोधन गर्ने निश्चित भएको छ ।
पहिलो बैठकमा नेकपा एमालेबाट भीम आचार्य, नेपाली काँग्रेसबाट केदार कार्की, नेकपा माओवादी केन्द्रबाट इन्द्र आङ्बो, संघीय समाजवादी फोरमबाट जयराम यादवले सम्बोधन गर्नेछन् ।
यस्तै संघीय लोकतान्त्रिक राष्ट्रिय मञ्चका विष्णु तुम्बाहाम्फे, राप्रपाका इन्दिरा राई र स्वतन्त्र नारायणबहादुर मगरले पनि बैठकलाई सम्बोधन गर्ने भएका छन् ।
बैठकमा प्रदेशसभा सञ्चालनको अन्तरिम कार्यबिधि पास गर्ने, बैठकको अध्यक्षता गर्ने अध्यक्षमण्डल तोक्ने र दलका प्रतिनिधिहरुले सम्बोधन गर्ने कार्यसूची रहेको छ ।
त्यस्तै प्रदेशसभामा मर्यादा पालकको ड्रेस कोड फिक्स गरिएको छ । प्रदेश सभामा महिला र पुरुष गरेर २४ जना मर्यादा पालक रहने छन् ।
मर्यादा पालक पुरुषले सेतो दौरा सुरुवाल, कालो कोट र भादगाउँले टोपी लगाउने छन् भने महिला मर्यादा पालकले रातो पारी भएको सेतो सारी, कलेजी रंगको चोलो र कालो कोट लगाउने छन् ।
