साउन २२, काठमाडौं । नेपाली कांग्रेसका सांसद राजेन्द्र कुमार केसीले खानेपानी मन्त्री विना मगर र सचिवका कारण राजधानीबासीहरुले मेलम्चीको पानी पिउन नपाएको आरोप लगाएका छन् ।
प्रतिनिधीसभाको बुधबार बसेको बैठकमा ‘खानेपानी तथा सरसफाई विधेयक २०७५’ माथि को सैद्धान्तिक छलफलमा सहभागी हुदै सांसद केसीले अन्तिम चरणमा रहेको मेलम्ची आयोजनाको पानी मन्त्री र सचिवका कारण राजधानी आउन नपाएको दाबी गरेका हुन् ।
उनले भने,“काठमाण्डौ जस्तो ठाँउमा हामीले खानेपानी दिन सकेका छैनौं । मन्त्री ज्यु यहाँ हुनुहुन्छ । म अत्यन्तै दुखका साथ भन्न चाहन्छु कि हाम्रा स्वर्गीय कृष्ण प्रसाद भट्टराईका २० औ बर्षको आयोजनाको रुपमा रहेको मेलम्ची तपाईका कारणले मेलम्चीको खानेपानी राजधानीलाई उपलब्ध हुन सकेको छैन । मुखमा आएको गाँस सचिव र तपाईका कारणले राजधानीबासीलाई पानी उपलब्ध हुन सकेको छैन मन्त्री ज्यु यसमा तपाई क्लीयर गर्नुहोला । राजधानीबासी काकाकुल छन् । ”
एक गाग्री पानीका लागि अहिले पनि किर्तिपुर नगरबासीहरु बिहानैदेखि छटपटाएर हिड्ने गरेको भन्दै उनले खानेपानीको मुहान संरक्षण सहितको व्यवस्था विधेयकमा गर्न सुझाव दिएका छन् । उनले पानीको मुहान संरक्षण र स्रोत विस्तारका सवालमा विस्तृत अध्ययन गर्नु जरुरी रहेको बताए ।
