१३ भदौ, विराटनगर । एनआईसी एशिया बैंकले बचतमा ब्याजका अतिरिक्त बिमा सुविधा दिनेगरि सुपर चमत्कारिक निक्षेप योजना संचालनमा ल्याएको छ ।
आफ्नो २२ औं बार्षिकोत्सवको अवसरमा उक्त योजना अन्र्तगत सो बैंकले सबै तह तप्काका ग्राहकहरुका लागि विभिन्न खाताहरु संचालनमा ल्याएको हो ।
सुपर चमत्कारिक बचत खाताहरु अन्र्तगत सुपर चमत्कारिक नारी बचत खातासहित सोही शीर्षकमा ज्येष्ठ नागरिक,बाबु नानी बचत खाता, विद्यार्थी बचत खाता,स्वरोजगार बचत खाता,बैदेशिक रोजगार खाता,उद्यमशील बचत खाता र सुपर चमत्कारिक तलब बचत खाता संचालनमा ल्याइएको हो ।
बैंकको प्रदेश कार्यालयले शुक्रबार नेपाल पत्रकार महासंघ मोरङ शाखामा पत्रकार सम्मेलनको आयोजना गद शुक्रबार बाटै प्रदेश–१ मा ती खाताहरु संचालनमा ल्याइएको जानकारी गराएको छ ।
बैंकका प्रदेश–१ प्रमुख दिपक थापाले सिल्भर,गोल्ड र डाइमण्ड गरि तीन सेगमेन्टमा संचालनमा ल्याइएका ती खाता धारकहरुले बैंकले बचतमा दिने उच्चतम ब्याजका अतिरिक्त अधिकतम १ करोड ३१ लाख ५० हजारसम्मको बिमा सुविधा समेत प्राप्त गर्न सक्ने जानकारी गराए ।
तीनवटै सेगमेन्टमा बिमा सुविधा रहेपनि न्युनतम १ हजारको सिल्भर,२५ हजारमा गोल्ड र १ लाखमा डाइमण्ड सेगमेन्टको खाता खोल्न सकिने र बचत अनुसारकै बिमा सुविधा उपलब्ध हुने बताए ।
बैंकका प्रदेश उपप्रमुख बिष्णुप्रसाद आचार्यले यसअघि बैंकका खाताधारीहरुले समेत आफ्नो खातालाई सुपर चमत्कारिक खातामा परिर्वतन गर्न सक्ने प्रावधान रहेको बताए । उक्त बैंकका प्रदेश १ मा ५५ वटा र देशभरिमा २ सय ९७ वटा शाखा कार्यालयहरु रहेको जनाइएको छ ।
खाताधारीहरुलाई बैंकले निशुल्क रुपमा उपलब्ध गराउने एटिएम कार्डबाट जुनसुकै बैंकको एटिएमबाट अतिरिक्त शुल्क तिर्न नपर्ने गरी रकम झिक्न पाइने पनि जनाइएको छ ।
