१८ भदौ, काठमाडौं ।
बालुवाटारमा रहेको ललिता निवासको जग्गा अनियमितता प्रकरणमा अख्तियार दुरुपयोग अनुसन्धान आयोगले थप ५८ जनालाई बयानका लागि बोलाएको छ । आयोगले बुधबार सूचना निकालेर सात दिनभित्र उपस्थित हुन भनेको छ ।
५८ जनामध्ये दुई जना गुठी संस्थानका तत्कालीन कर्मचारी हुन् । अख्तियारले यसअघि ८६ जनालाई बयानका लागि बोलाएको थियो ।
‘सरकारले मुआब्जा दिई अधिग्रहण गरिलिएको ललिता निवास क्याम्पभित्र पर्ने २९९ रोपनी सरकारी जग्गा मालपोत कार्यालय काठमाण्डौ, डिल्लीबजारका कर्मचारीहरूसमेतको मिलेमतोमा विभिन्न मितिमा गैरकानुनी तरिकाले व्यक्ति विशेषलाई फिर्ता दिई अनधिकृत व्यक्तिहरूलाई जग्गाधनी र मोही कायम गरी भ्रष्टाचार गरेको भन्नेसमेत व्यहोराको उजुरीको अनुसन्धानको सिलसिलामा तपाईंसँग केही बुझ्नुपर्ने भएकाले यो म्याद सूचना प्रकाशित गरिएको छ’ अख्तियारको सूचनामा उल्लेख छ ।
सात दिनभित्र उपस्थित नभए कानुनअनुसार कारबाही प्रक्रिया अघि बढ्ने अख्तियारले चेतावनीसमेत दिएको छ ।
