४ असोज, एजेन्सी ।
साउदी अरेबियामा अमेरिकाले आफ्नो सेना पठाउने योजना सार्वजनिक गरेको छ । साउदी अरेबियाका दुई ठूला तेल प्रशोधन केन्द्रमा भएको ड्रोन तथा क्रुज मिसाइल आक्रमणपछि अमेरिकाले सेना पठाउने योजना बनाएको हो ।
अमेरिकी विदेश मन्त्री माइक पोम्पेओका अनुसार रक्षात्मक प्रयोजनका लागि सेना पठाउने तयारी गरिएको हो । साउदी अरेबिया अमेरिकी सेना कति संख्यामा पठाउने भने खुलाइएको छैन ।
गएको हप्ता साउदी अरेबियामा सरकारी स्वामित्वका दुई तेल प्रशोधन केन्द्रमा भएको आक्रमणको जिम्मा इरानको साथ पाएको यमनको हुथी बिद्रोहीले लिएको छ । तर आक्रमण हुथी बिद्रोहीबाट नभई इरानबाटै भएको अमेरिका र साउदी अरेबियाको दाबी छ । इरानले यो आरोप अस्वीकार गर्दै आएको छ ।
अमेरिकी राष्ट्रपति डोनाल्ड ट्रम्पले शुक्रबार इरानविरुद्ध उच्च तहको प्रतिबन्ध लगाउने बताएका थिए । उनले सैन्य तनाव सकेसम्म नहोस् भन्ने पक्षमा आफू रहेको बताएका छन् । अमेरिकाले लगाउने नयाँ प्रतिबन्ध इरानको केन्द्रीय बैंकमा केन्द्रित हुनेछ ।
साउदी अरेबिया र संयुक्त अरब इमिरेट्सको संयुक्त आग्रहमा अमेरिकाले सेना पठाउन लागेको अमेरिकी रक्षा मन्त्रालय पेन्टागनको भनाई छ । अमेरिकी सेनाले साउदी सेनासँग सहकार्य गरेर हवाई तथा मिसाइल सुरक्षा प्रणालीलाई बलियो बनाउने बताइएको छ ।
सरकारी स्वामित्वको तेल कम्पनी अरामकोका अबकेक र खुराइसमा रहेका दुई प्रशोधन केन्द्रमा गएको शनिबार १८ वटा ड्रोन तथा सातवटा क्रुज मिसाइल आक्रमण भएको साउदी अरेबियाको रक्षा मन्त्रालयले जनाएको छ । यो आक्रमण पछि साउदी अरेबियाले तेल तथा ग्यासको उत्पादनमा कटौती गरेको छ ।
