२९ असोज, काठमाडौँ ।
कृषि तथा पशुपंक्षी विकास मन्त्री चक्रपाणि खनालले मुलुकभित्रै उपलब्ध खाद्य पदार्थलाई व्यवस्थित गर्न नसकिएको बताएका छन् । ३९ औ विश्व खाद्य दिवसको सन्र्दभमा बुधबार कृषि विभागले गरेको कार्यक्रमलाई सम्बोधन गर्दे मन्त्री खनालले मुलुकभित्रै आवश्यक खाद्य पदार्थ उपलब्ध भएपनि त्यसको समुचित व्यवस्थापन गर्न नसकिएको बताएका हुन् ।
भौगोलिक बनावट, क्षेत्रगत रुपमा विद्यमान ऐतिहासिक कारण लगायतले खाद्य सुरक्षाको बारेमा पर्याप्त ज्ञान भएकाले त्यसको समुच्च व्यवस्थापनमा पनि समस्या देखिएको भनाई उनको भनाई छ । उनले भने “खाद्य सन्र्दभमा आवश्यक खाद्य पदार्थ हुदै नभएको त होइन तर त्यसलाई व्यवस्थित गर्न नसकिएको चाही हो । त्यसको पछाडि केही हाम्रा ऐतिहासिक कारणहरु छन् । समाजको बनौट, हाम्रा विभिन्न डाँडापाखा , दुरदराजमा बनिएका गाउँ वस्तीहरु र त्यहाँ उत्पादन हुने रैथाने जातका उत्पादनहरु र ती जातहरुलाई अहिलेको सन्र्दभमा के चीज कमी छ के बढी छ ? समुच्च के चाहीने ? भन्ने त्यत्ति राम्रो जानकारी पुग्न सकेको छैन । अव्यवस्थित खाने शैली छ । कोही खान नपाएर र कोही बढी खाएर मर्ने स्थिति रहेको छ । ”
उनले खाने शैलीमा परिर्वतन ल्याउनुको साथै खाद्य वितरण प्रणालीलाई पनि सुधार गर्नुपर्ने बताए । संयुक्त राष्ट्रसंघीय खाद्य तथा कृषि संगठन स्थापनाको सम्झनामा सबैलाई खाद्य सुरक्षा तथा पोषणबारे जानकारी गराउने उद्देश्य साथ विश्व खाद्य दिवस १ सय ५० देशले मनाउदै आएका छन् ।
