१४ कार्तिक, कपिलवस्तु । कपिलवस्तुको सीमा नाका कृष्णनगर तनावग्रस्त बनेको छ । लक्ष्मीको मूर्ति विर्सजन गर्ने क्रममा दुई पक्षबीच विवाद हुँदा हिजो बेलुकादेखि कृष्णनगर तनावग्रस्त बनेको हो ।
प्रदर्शनका क्रममा केही घाइते समेत भएका छन् । हिजो बेलुकी प्रहरीले स्थिति नियन्त्रणमा लिन १५ राउण्ड हवाई फायर गरेको थियो । दोहोरो झडपमा प्रहरीको गोली लागेर स्थानीय सुरजकुमार पाण्डेको मृत्यु भएको छ । आज बिहानैदेखि प्रदर्शनकारीहरु समुह–समुह बनाएर सडकमा उत्रिएपछि स्थिति तनावग्रस्त बनेको छ ।
आज पनि प्रहरी र प्रदर्शनकारीबीच झडप भएको छ भने प्रहरीले स्थिति नियन्त्रणमा लिन लाठीचार्जदेखि अश्रुग्यास प्रहार गरेको छ ।प्रदर्शनकारीले बसपार्कमा रहेको पुलिस बिट जलाइदिएका छन् । अहिले कृष्णनगरमा बाक्लो संख्यामा सुरक्षाकर्मी परिचालन गरिएको छ ।
लक्ष्मीको मूर्ती विर्सजन गर्न बनाइएको बाटो छाडेर अर्को बाटो प्रयोग गरेको निहुँमा विवाद बढेको प्रहरीले जनाएको छ । यसैबीच तनाव बढेपछि जिल्ला प्रशासन कार्यालय, कपिलवस्तुले कर्फ्यू आदेश जारी गरेको छ ।
कृष्णनगर भन्सारको उत्तरतर्फ सातसय मिटर, पश्चिमतर्फ सातसय मिटर र पूर्वतर्फ तीन सय मिटर भित्र विहीबार ११ बजेदेखि अर्को आदेश जारी नभएसम्म कर्फयू आदेश जारी भएको हो ।
