१८ कात्तिक, विराटनगर ।
कोशी राजमार्गअन्तर्गत मोरङको बुढीगंगा गाउँपालिका १ स्थित शान्ति चोकमा सवारी दुर्घटना हुँदा एकैपरिवारका दुईजनाको मृत्यु भएको छ ।
सोमबार बिहान भएको सवारी दुर्घटनामा परी डाक्टर र नर्स रहेका बाबु छोरीको मृत्यु भएको हो । दुर्घटनामा परी बुढीगंगा गाउँपालिका ५ घर भएका ५२ वर्षीय नेत्र रोग विशेषज्ञ डा. सुवालाल माझी र स्टाफ नर्स रहेकी उनकी छोरी २६ वर्षीया अञ्जली माझीको मृत्यु भएको प्रहरीले जनाएको छ ।
को २७ प १०२२ नम्बरको मोटरसाइकलमा विराटनगर आउँदै गरेका उनीहरुलाई सुनसरीको खनारतर्फ जाँदै गरेको को १ ख ७२३२ नम्बरको बसले ठक्कर दिएको मोरङ प्रहरीका प्रवक्ता डीएसपी राजकुमार खिँउजुले जानकारी दिए ।
दुर्घटनामा परेर घाइते भएका दुवै जनालाई उपचारका क्रममा विराट अस्पतालमा र्पुयाउँदा चिकित्सकले मृत घोषणा गरेको खिँउजुको भनाइ छ । सुवालाल विराटनगरको गोल्छा आँखा अस्पतालका नेत्र रोग विशेषज्ञ हुन भने अञ्जलीकुमारी न्युरो अस्पतालकी स्टाफ नर्स हुन ।
लेन अनुशासन मिचेर तीव्र गतिमा अघि बढिरहेको बसले विपरित दिशाबाट आउँदै गरेको मोटरसाइकललाई ठक्कर दिँदा दुर्घटना भएको हुनसक्ने प्रहरीले जनाएको छ । बस र चालक सिरहाका सञ्जिव खत्रीलाई प्रहरीले नियन्त्रणमा लिएको जनाएको छ ।
