१८ कात्तिक, एजेन्सी । अमेरिकी प्रसिद्ध रेष्टुराँ म्याक्डोनल्ड्सले आफ्ना प्रमुख कार्यकारी स्टीभ इस्टरब्रुकलाई जागिरबाट निष्काशन गरेको छ । आफ्नै कार्यालयका एक कर्मचारीसँग प्रेमसम्बन्ध राखेको पाइएपछि उनलाई निष्काशन गरिएको हो ।
‘कम्पनीको नीति उल्लंघन गरेको’ र ‘कमजोर निर्णय क्षमता देखाएका’ भन्दै इस्टरब्रुकलाई हटाइएको म्याकडोनल्ड्सले जनाएको छ । यद्यपि, दुई जनाबीचको सम्बन्ध सहमतिमै आधारित भएको पनि उसले प्रष्ट्याएको छ ।
इस्टरब्रुकले पनि महिला कर्मचारीसँग आफ्नो प्रेमसम्बन्ध रहेको स्वीकार्दै आफूले गल्ती गरेको कर्मचारीहरूलाई पठाएको पत्रमा उल्लेख गरेका छन् । कम्पनीको मूल्यलाई ध्यान दिँदै जागिर छोड्न बोर्डसँग सहमति गरेको पनि उनले बताएका छन् ।
कम्पनीको नीतिले व्यवस्थापकहरूलाई आफूसँग तल्लो तहका कर्मचारीसँगको प्रेम सम्बन्धलाई रोकेको छ ।
५२ वर्षीय ब्रिटिश नागरिक इस्टरब्रुकले श्रीमतीसँग भने सम्बन्धविच्छेद गरिसकेका छन् । यसअघि पहिलो पटक सन् १९९३ मा उनले लन्डनमा म्याक्डोनल्ड्सको व्यवस्थापकका रूपमा काम थालेका थिए ।
सन् २०१५ मा उनी म्याक्डोनल्ड्सका प्रमुख कार्यकारी पदमा नियुक्त भएका उनलाई म्याक्डोनल्ड्सका मेन्यू तथा रेस्टुराँमार्फत् अझ राम्रा कुरा पस्केर कम्पनीलाई अगाडि बढाएको श्रेय जाने गरेको छ । उनकै कार्यकालमा कम्पनीको शेयर मूल्य पनि दुई गुणाभन्दा बढीले बढेको थियो ।
म्याक्डोनल्ड्सका अध्यक्ष र बोर्ड सदस्य पदबाट पनि उनले राजीनामा दिएको अन्तर्रा्ष्ट्रिय समाचार संस्थाहरुले जनाएका छन् । पदबाट हटाइएपछि उनलाई दिइने रकमबारे भने जानकारी गराइएको छैन ।
इस्टरब्रेुकको स्थान अब कम्पनीकै क्रिश केम्पजिन्स्की पाउने पनि जनाइएको छ ।
