२८ कार्तिक, काठमाडौं । जिल्ला सरकारी वकिल कार्यालयले व्यापारिक घराना ज्योति समूहका सदस्य रूप ज्योति र उनको परिवारविरूद्ध दिएको जाहेरी फिर्ता लिने जाहेरवाला विज्ञेन्द्रकृष्ण मल्लको निवेदन प्रहरीलाई पठाइदिएको छ ।
जाहेरी फिर्ताको उक्त निवेदनमाथि अनुसन्धान गर्न भन्दै सरकारी वकिल कार्यालयले प्रहरीलाई सक्कल मिसिलसहितका कागजात पठाएको जिल्ला सरकारी वकिल कार्यालय काठमाडौंका सूचना अधिकारी नुमराज खनालले बताए ।
मल्लले जाहेरी फिर्ता गरीपाउँ भन्ने निवेदन बुधबार सरकारी वकिल कार्यालयमा दिएका थिए। मल्लले रूप ज्योतिविरूद्ध दिएको मुद्दा फिर्ता गर्न नेगोसियसन भइरहेको बताएका छन् ।
जाहेरी फिर्ता लिने उनको निवेदनमाथि अनुसन्धान गरेर फेरी प्रहरीले सरकारी वकिल कार्यालयलाई प्रतिवेदन बुझाउनु पर्ने छ । रूप ज्योतिमाथि अदालतले अनुसन्धान गर्न दिइएको पाँच दिन म्यादभित्रै प्रतिवेदन प्रहरीले सरकारी वकिललाई बुझाइसक्नुपर्ने छ। भोलि अदालतले दिएको म्याद सकिन्छ ।
यात भोलिसम्म यो निवेदनमाथि पनि अनुसन्धान गरेर प्रहरीले प्रतिवेदन दिने र सरकारी वकिलले मुद्दा चलाउनेर नचलाउने निर्णय गरीसक्नुपर्ने छ या रूप ज्योतिमाथि दिइएको अनुसन्धान गर्ने म्याद थप्नुपर्ने छ ।
