१८ पुस, काठमाडौं ।
सत्तारुढ नेपाल कम्युनिष्ट पार्टी नेकपाले राष्ट्रियसभाका उम्मेदवारहरुको नाम टुंगो लगाएको छ ।
पार्टीले प्रवक्ता नारायणकाजी श्रेष्ठलाई पनि राष्ट्रियसभाको उम्मेदवार बनाउने निर्णय गरेको छ । शुक्रबार बिहान बालुवाटारमा बसेको सचिवालय बैठकले उम्मेदवारको नाम टुंगो लगाएको हो ।
जस अनुसार प्रदेश १ महिलामा इन्दु गौतम, दलितमा गोपी अछाम तथा अन्यमा देवेन्द्र दाहाललाई उम्मेदवार चयन गरिएको छ । यस्तै प्रदेश २ मा महिलामा तुलसा दाहाल र दलितमा राधेश्याम पासवान, प्रदेश ३ बाट महिलामा गंगा वेल्वासे तथा अन्यमा बेदुराम भुषाललाई चयन गरिएको छ ।
गण्डकी प्रदेशबाट अन्यमा नारायणकाजी श्रेष्ठ र महिलामा भगवती न्यौपाने तथा प्रदेश ५ मा महिलामा विमला घिमिरे, अपांगतामा जगप्रसाद शर्मा तथा अल्पसंख्यकमा गोपाल भटटराईलाई उम्मेदवार चयन गरिएको छ ।
यस्तै कर्णालीमा अयमा मायाप्रसाद शर्मा र महिलामा सुमित्रा विसिलाई छनौट गरिएको छ । सुदुरपश्चिममामा अन्यमा तारामान स्वार र महिलामा शारदा भट्टलाई उम्मेदवार बनाउने निर्णय नेकपाले गरेको छ ।
राष्ट्रियसभाका १८ रिक्त पदका लागि आगामी माघ ९ गते निर्वाचन हुँदैछ। निर्वाचनका लागि पुस २० गते मनोनयन दर्ता गर्ने कार्यतालिका रहेको छ।
