२५ पुस, काठमाडौं ।
काठमाडौँमा जारी कतार एअरवेज सहिद स्मारक ए डिभिजन लिग अन्तर्गत पाँचौ चरणको खेलमा मछिन्द्र क्लब र मनाङ मस्र्याङ्दी क्लबबीचको खेलपछि भएको झगडाको घटनालाई लिएर अखिल नेपाल फुटबल संघ (एन्फा)ले ६ खेलाडीलाई कारवाही गरेको छ ।
बिहीबार आफ्नो वेबसाइटमा सूचना जारि गर्दै एन्फाले मनाङका जगजित श्रेष्ठ र अशोक बराललाई ५–५ खेल तथा अन्य ४ खेलाडीलाई २–२ खेल प्रतिबन्ध लगाएको जनाएको हो ।
एन्फाका अनुसार जगजित र अशोकले जरिवाना स्वरुप जनही १० हजार रुपैयाँ तिर्नुपर्ने भएको छ । अशोकले उक्त खेलपछि रातो कार्डसमेत पाएका हुनाले उनले ६ खेल गुमाउनेछन् । मनाङका रंजन विष्टलाई पनि २ खेल प्रतिबन्ध लगाइएको छ ।
यता मछिन्द्रबाट दीपक राई, देवेन्द्र तामाङ र विजय धिमालले पनि २–२ खेल प्रतिबन्ध भोग्नेछन् । मनाङका अफिसियल शिव लामाले भने लिग अवाधिबर प्रतिबन्ध भोग्दै १० हजार रुपैयाँ जरिवाना समेत तिर्नुपर्ने भएको छ । उनले मैदान प्रवेश विपक्षी खेलाडीलाई अपशब्द बोल्दै स्थिति तनावग्रस्त बनाएका थिए । एन्फाले दुवै क्लबलाई ५०–५० हजार जरिवाना समेत गराएको छ ।
लिग अन्तर्गत सोमबार दशरथ रंगशालामा उपाधि दाबेदार र हाल लिगका दुई शीर्ष टोलीबीचको खेल २–२ को बराबरीमा सकिएको थिए । तर, खेल सकिएपछि रेफ्रीसँग मैदानको बीच भागमा गएर एकआपास हात मिलाउनु पर्ने दुई टोलीका खेलाडी हात हालाहालमा नै उत्रिएका थिए ।
