२५ पौष, काठमाडौं । फेसबुक लगायतका सामाजिक सञ्जालबाट पार्सल आएको छ भन्दै ठगी गर्ने पाँच जनालाई नेपाल प्रहरीले पक्राउ गरेको छ ।
प्रहरीको केन्द्रीय अनुसन्धान ब्युरो सिआइबीको टोलीले दुई जना विदेशी नागरिकसहित तीन जना नेपालीलाई पक्राउ गरेको छ । प्रहरीले मुख्य अभियुक्त नाइजेरियन नागरिक साइरिल चिनोन्सो आइबेस, आइभेरीकोष्टका आसापे एडजी पिइरजिनसहित चितवनका रामचन्द्र गैह्रे, हरि ओझा र ठमेलका उमेश श्रेष्ठलाई पक्राउ गरिएको एसपी बेलबहादुर पाण्डेले जानकारी दिए ।
फेसबुक, वाट्स एप, भाइबर,इमो र ट्वीटर प्रयोग गरेर उनीहरूले नेपाली ठग्ने गरेको उनले बताए । विदेशी नागरिकको प्रोफाइल बनाएर उनीहरूले बहुमूल्य सामान गिफ्ट भन्दै ठगी गर्ने गरेका थिए ।
‘नेपाल आउँदैछु, तपाईंको साथीले गिफ्ट पठाएको’ भन्ने र विमानस्थलमा एक्सरेमा हेर्दा सो गिफ्टभित्र अमेरिकी डलर देखिएको भन्दै त्यसलाई छुटाउन केही रकम लाग्ने भन्दै खाता नम्बर दिएर त्यसमा पैसा हाल्न लगाएको भेटिएको एसपी पाण्डेले बताए ।
