४ माघ, सुनसरी ।
सुनसरीको इनरुवामा सम्पन्न मनमोहन मेमोरियल राष्ट्रिय एकदिवसिय क्रिकेट प्रतियोगिताको उपाधि त्रिभुवन आर्मी क्लबले जितेको छ । शनिवार इनरुवा क्रिकेट मैदानमा भएको फाइनलमा त्रिभुवन आर्मी क्लबले नेपाल पुलिस क्लबलाई ८५ रनले पराजित गर्दै उपाधि जितेको हो ।
यो सँगै विजेता आर्मीले ४ लाख ५ हजार प्राप्त गरेको छ भने उप–विजेता पुलिसले २ लाख ५ हजारमा नगद प्राप्त गरेको छ । १ सय ८५ रनको विजयी लक्ष्य पक्ष्याएको पुलिस २४.४ ओभरमा अल आउट हुँदै ९९ रनमा समेटियो ।
पहिलो ओभरको तेस्रो बलमै स्पिनर सुशन भारीले ओपनर पवन सरार्फलाई शून्यमा बोल्ड आउट गरे । छैटौं ओभरको चौथो बलमा अर्का ओपनर सुनिल धमलालाई बिक्रम शोबले राजु रिजालबाट ८ रनमा क्याच गराए ।
११ औं ओभरको चौथो बलमा कुशल मल्लले अमित श्रेष्ठलाई २३ रनमा एलबी डब्लू आउट गरे । अमितले २८ बलमा ४ चौका प्रहार गरे । १३ औं ओभरको अन्तिम बलमा कुशल मल्लले दीपेन्द्र सिंह ऐरीलाई ५ रनमा विकेटकिपर राजु रिजालबाट स्टम्पिङ आउट गरेपछि पुलिसको उपाधिको सम्भावना टाढिएको थियो ।
१७ औं ओभरको दोस्रो बलमा अनिल कुमार शाहलाई साहब आलमले २१ रनमा बोल्ड आउट गरे । दिलिप नाथ ४, कुशल भुर्तेल २६ रनमा अबिजित र कप्तान मञ्जित श्रेष्ठले १ रनको योगदान दिए । आर्मीलाई उपाधि दिलाउन सुशन भारीले ५।१ ओभरमा २१ रन खर्चेर ४ विकेट लिए । कुशल मल्ल र साहब आलमले २–२ विकेट लिए ।
त्यसअघि टस हारेर ब्याटिङ थालेको आर्मी ४८।५ ओभरमा अल आउट हुँदै १ सय ८४ रनमा समेटिएको थियो । खराव सुरुवात गरेको आर्मीलाई कप्तान विनोद भण्डारी र बिक्रम शोबले आठौं विकेटका लागि ५३ रनको महत्त्वपूर्ण साझेदारी गर्दै प्रतिस्पर्धात्मक योगफलमा पुर्याएका थिए ।
यी दुईबीचको साझेदारी दीपेन्द्र सिंह ऐरीले ४४ औं ओभरको पाचौं बलमा बिक्रमलाई १५ रनमा एलबीडब्लू आउट गर्दै तोडेका थिए । विनोदले सर्वाधिक ४० रनको योगदान दिए । पवन सरार्फलाई ठुलो सट प्रहार गरेका विनोद लङ अनमा अनिल कुमार शाहबाट क्याच हुनुअघि विनोदले ६६ बलमा ४ चौका प्रहार गरे ।
आठौं ओभरको पहिलो बलमा दीपेन्द्र सिंह ऐरीले ओपनर अनिल कुमार मण्डललाई ५ रनमा बोल्ड आउट गरे । ११ औं ओभरको तेस्रो बलमा ललित नारायण राजवंशीले सुनिल धमलाबाट राजु रिजाललाई २२ रनमा क्याच गराए । राजुले ३६ बलमा ४ चौका प्रहार गरे ।
१४ औं ओभरको तेस्रो बलमा सागर ढकालले रोहित कुमार पौडेललाई ११ रनमा एलबीडब्लू आउट गरे । १७ औं ओभरको चौथो बलमा भिम सार्कीलाई ललितले ७ रनमा बोल्ड आउट गरे ।
२० औं ओभरको चौथो बलमा कुशल मल्ललाई सागरले १३ रनमा विकेटकिपर दिलिप नाथबाट स्टम्पिङ आउट गराए । कुशलले १० बलमा २ चौका प्रहार गरे । हरि बहादुर चौहान ३ रनमा आउट भए ।
सागरले २८ औं ओभरको पहिलो बलमा दिलिपबाट राजेश पुलामी मगरलाई ३१ रनमा क्याच गराएपछि आर्मी संकटमा परेको थियो । राजेशले ४९ बलमा ४ चौका प्रहार गरे । सुशन भारी ८ र साहब आलमले ४ रन जोडे ।
पुलिसका स्पिनर सागर ढकालले १० ओभरमा १ मेडन सहित २९ रन खर्चेर ३ विकेट लिए । ललित नारायण राजवंशीले १० ओभरमा १ मेडन सहित ३२ रन खर्चेर ३ विकेट लिए । दीपेन्द्रले ९.५ ओभरमा २७ रन खर्चेर ३ र पवन सरार्फले १ विकेट लिए ।
