१५ माघ, हेटौँडा । हेटौँडाको शहीद स्मारकमा मङ्गलबार राष्ट्रपति विद्यादेवी भण्डारीले प्रजातान्त्रिक पार्कमा निर्माण गरिएका प्रतिमाहरुको अनावरण गरेकी छन् ।
राष्ट्रपति भण्डारीले प्रजातान्त्रिक पार्कमा निर्माण गरिएका पुष्पलाल श्रेष्ठ, बीपी कोइराला, गणेशमान सिंह र मनमोहन अधिकारीको प्रतिमा अनावरण गरेकी हुन् । स्मारकमा विभिन्न कालखण्डमा शहीद भएका १२ जनाको एउटै ढुङ्गामा कुँदिएको मुखाकृत स्तम्भ र जननेता मदन भण्डारीको प्रतिमामा पनि उनले माल्यापर्ण गरिन् । शहीद सप्ताहको सातौँ कार्यक्रम अन्तर्गत मङ्गलबार प्रजातान्त्रिक पार्कमा निर्माण गरिएको प्रतिमाको अनावारण गर्न राष्ट्रपति विद्यादेवी भण्डारी हेटौँडा पुगेकी थिइन् ।
कार्यक्रमकै अवसरमा राष्ट्रपति भण्डारीले हेटौँडामा पर्यटन प्रवद्र्धन गर्न भौतिक पूर्वाधार विकासमा ध्यान दिनुपर्ने बताइन् । उनले हेटौँडाको शहीद स्मारक सबैको साझा थलोका रुपमा विकास भएको भन्दै खुशी व्यक्त गरिन् । स्मारकको थप सुधार गर्नका लागि उनले शुभकामना समेत व्यक्त गरिन् ।
शहीद स्मारक विकास समितिले झण्डै डेढ करोड रुपैयाँ खर्च गरेर शालिक निर्माण गरको जनाएको छ । यसअघि शहीद स्मारकमा विभिन्न कालखण्डका सम्पूर्ण शहीदलाई एकै थलोमा स्मरण गर्न ६५ फिट अग्लो शहीद स्मृति स्तम्भ निर्माण गरिएको थियो । त्यो स्तम्भको पनि राष्ट्रपति भण्डारीले अनावरण गरेकी थिइन् ।
स्मारकमा विभिन्न राष्ट्रभक्तिपूर्ण युद्ध र विभिन्न जनसङ्घर्षमा शहीद भएका १२ जना शहीदको एउटै ढुङ्गामा मुखाकृत कुँदिएको छ । विसं २०४६ सालको जनआन्दोलनपछि २०४७ साल साउन ७ गते उजाड डाँडोमा वृक्षारोपण गरी शहीद स्मृति बाटिका नामाकरण गरिएको थियो ।
विसं २०५२ सालमा तत्कालीन प्रधानमन्त्री मनमोहन अधिकारीले उद्घाटन गरेको शहीद स्मारक देशकै नमुना शहीद केन्द्र बन्न पुगेको छ । यहाँ बर्से्नि पाँच लाखभन्दा बढी आन्तरिक र बाह्य पर्यटक आउने गरेको समितिका सचिव न्यौपानेले दाबी गरे । स्मारकमा यसअघि नै नेता मदन भण्डारीको पनि प्रतिमा निर्माण भैसकेको छ ।
