१६ माघ, विराटनगर ।
विराटनगरकी ११ वर्षीया बालिकाको बलात्कारपछि हत्या गर्ने दुईजनालाई आजीवन काराबासको सजाय सुनाइएको छ । हत्या गरेको आरोपमा पक्राउ परेका दुईजनालाई बिहीबार जिल्ला अदालत मोरङका न्यायाधीश तेजबहादुर खड्काको इजलासले आजीवन काराबासको सजाय सुनाएको हो ।
विराटनगर महानगरपालिका ८ कि ११ वर्षीया बालिकाको अपहरण गरी सामूहिक बलात्कारपछि हत्या गरेको आरोपमा २५ बर्षका अब्वास अन्सारी र १९ बर्षका चन्दु महतो पक्राउ परेका थिए । २०७५ माघ १२ गते छिमेकमा साँझ टिभी हेर्न गएकी बालिकालाई छिमेकी नै रहेका अन्सारी र महतोले खाली मैदानमा लगी बलात्कारपछि हत्या गरेर सिंघिया खोलामा शव फालेका थिए । बालिकाको शव माघ १३ गते दिउँसो भेटिएको थियो
जिल्ला अदालत मोरङका श्रेस्तेदार ईश्वरमणि ओझाका अनुसार न्यायाधीश खड्काको इजलासले बलात्कार र हत्या कसुरमा आजीवन काराबास र पीडिकबाट जनही ५० हजार क्षतिपूर्ति भराउने फैसला गरेको छ ।
