२१ माघ, काठमाडौं । प्रहरी प्रधान कार्यालयले केही जिल्लाका प्रहरी प्रमुख सरूवा गरेसंगै चितवनमा एसपी नान्तीराज गुरूङलाई पठाइएको छ ।
यसअघि चितवनमा एसपी गंगा पन्तलाई सरूवा गरिएको थियो । पन्तलाई चितवन जान रमना नदिइएपछि अहिले गुरूङलाई सरूवा गरिएको हो । एसपी पन्तलाई जिल्ला प्रहरी कार्यालय पर्सामा पठाइएको छ ।
पर्साका प्रहरी प्रमुख एसपी सोमेन्द्रसिंह राठौर काठमाडौं प्रहरी परिसर सरूवा भएका छन् । बारामा एसपी कृष्ण पंगेनीलाई पठाइएको प्रहरी प्रधान कार्यालय स्रोतले जानकारी दिएको छ ।
चितवनमा गत पुसदेखि एसपी रिक्त थियो । एसपी दानबहादुर मल्लको सरूवा भएको लामो समयदेखि प्रहरी प्रधान कार्यालयले एसपी पठाउन सकेको थिएन ।
नेकपाका अध्यक्ष पुष्पकमल दाहाल प्रचण्डका पूर्वबडीगार्ड मल्लले सरूवा भएको १५ दिनसम्म चितवन छाडेका थिएनन् । उनलाई रमना लिएर चितवन छाड्न बागमती प्रदेश प्रहरी कार्यालयले २४ घण्टे अल्टिमेटम नै दिएको थियो ।
